Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 181 Hüküm no: 149 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb Beşe b. Şaban’ın varislerinin yarım hisse gemilerini Mustafa b. Mehmed’e satmaları Mahmiye-i Galata’ya tâbi‘ kasaba-i Tophâne mahallâtından Mustafa Ağa mahallesinde sâkin iken bundan akdem vefât eden Receb Beşe b. Şaban nâm müteveffânın verâseti zevce-i metrûkesi Hatice bt. Kemal ve vâlidesi Âişe bt. Hüseyin ve sulbî sagīr oğulları Mehmed ve Hüseyin ve sulbiye kızları Fâtıma ve Râbia ve Âişe nâm kimesnelere münhasıra olduğu zâhir ve mütebeyyin oldukdan sonra sagīrûn-ı mezbûrûnun tesviye-i umûrları için kıbel-i şer‘den mansûbe vasîsi olan müteveffâ-yı mezbûrun vâlidesi Âişe nâm hâtun sagīrûn-ı mezbûrûn tarafından vesâyeten ve mezbûre Hatice tarafından vekâleten ve kendi tarafından asâleten mahfil-i kazâda işbu hâfızü’l-kitâb Mustafa b. Mehmed nâm kimesne mahzarında ikrâr ve i‘tirâf edip mûrisimiz müteveffâ-yı mezbûr Receb Beşe’nin Karamürsel ta‘bîr olunur sefînenin nısf-ı âharı merkūm Receb Beşe’nin olup nısf-ı âharı yine mahalle-i mezbûre sâkinlerinden iken bundan akdem vefât eden Mustafa b. Ali nâm kimesne, müteveffâ[-yı mezbûr] ile müşterek olan sefîneyi zarûret-i deyni için bey‘ men yezîd olup rağabât-ı nâs münkatı‘a oldukdan sonra hîn-i müzâyedede müşterî-i mersûm Mustafa üzerinde nısfı bin üç yüz beş riyâl guruşda karâr edip ziyâde ile tâlib-i âharı olmamağla sefîne-i mezkûrenin nısfını asâleten ve vesâyeten ve vekâleten bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen eyledim ba‘de’l-yevm sefîne-i mezkûre nısfı merkūm Mustafa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde mukırra-i mezbûrenin asâleten ve vesâyeten ve vekâleten vech-i muharrer üzere ikrârını el-mukarru lehü’l-merkūm Mustafa vicâhen ve şifâhen tasdîk ve tahkīk edicek, sefîne-i mezkûrenin sıhhat-i bey‘ine hüküm birle mâ vaka‘a bi’t-taleb ketb olundu. Tahrîren fi’l-yevmi’l-ışrîn min şehri Rebî‘ilevvel li sene isneteyn ve hamsîn ve elf. Şuhûdü’l-hâl: Es-Sâbikūn.