Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 182 Hüküm no: 150 Orijinal metin no: [43a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Mahmud Efendi’nin kölesi Hasan b. Abdullah’ı hayattayken azat etmiş olduğu İşbu râfi‘ü’l-kitâb orta boylu açık kaşlı sol kaşının üzerinde eser-i cerâhati olan Rûsiyyü’l-asl Hasan b. Abdullah nâm kimesne meclis-i şer‘-i hatîr-i lâzimü’t-tevkīrde mahmiye-i Galata tevâbi‘inden kasaba-i Tophâne’de mahalle-i Perizat Hâtun sâkinlerinden iken bundan akdem vefât eden Mustafa Ağa b. Mahmud Efendi nâm müteveffânın verâseti sulbî kebîr oğlu İbrahim Ağa’ya ve sulbiye sagīre kızları Fâtıma ve Hatice’ye ve zevce-i metrûke ve vârisesi Semenzâr bt. Abdullah nâm hâtuna münhasıra oldukdan sonra mezbûre Semenzâr sadriye sagīre kızları mezbûretân Fâtıma ve Hatice’nin tesviye-i umûrlarına kıbel-i şer‘den mansûbe vasîleri olmağla mersûme Semenzâr tarafından ber nehc-i şer‘î vekâleti sâbite olan fahrü’l-kuzât Mustafa Efendi b. Receb ve merkūm İbrahim Ağa mahzarlarında takrîr-i da‘vâ edip abd-i memlûkü olduğumuz mezbûr Mustafa Ağa beni hâl-i hayâtında ve kemâl-i sıhhatinde tedbîr-i mutlak ile tedbîr edip merhûm-ı mezbûr rahmet-i melik-i Hayy-i Kayyûm’a intikāl ve irtihâl edip müteveffâ-yı mezbûrun sülüs mâlı kıymetime vefâ etmeğin mu‘tak olmuşumdur [43b] suâl olunup mûcebiyle amel olunmasın taleb ederim dedikde gıbbe’s-suâl ve’l-inkâr ve isre’l-istişhâd udûl-i müslimînden fahrü’l-kuzâti’l-islâm Yusuf Efendi b. Şaban ve Ali Ağa b. eş-Şeyh Cafer Efendi nâm kimesneler li ecli’ş-şehâde meclis-i şer‘a hâzırân olup fi’l-vâki‘ mezbûr Mustafa Ağa müdde‘î-i mersûmu hâl-i hayâtında tedbîr-i mutlak ile müdebber edip hâlâ mezbûr Mustafa Ağa müteveffâ olup sülüs mâlı müdde‘î-i mezbûrun kıymetine müsâ‘id olmağın mu‘tak olmuşdur, biz bu husûsa bu vech üzere şâhidleriz ve şehâdet dahi ederiz deyû her biri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a olup mezbûr Hasan’ın ıtkına hüküm birle mâ vaka‘a bi’t-taleb ketb olundu. Hurrire fi’l-yevmi’s-sânî ve’l-ışrîn min şehri Rebî‘ilevvel li sene isneteyn ve hamsîn ve elf. Şuhûdü’l-hâl: Davud Bey b. Abdullah el-Cündî, Hacı Bey b. Abdullah el-Cündî, Veli Beşe b. Ali er-Râcil, Veli Beşe b. Yağmur, Hasan Çelebi b. Abdullah, Mustafa b. Ahmed, Mahmud b. İlyas, Receb b. Abdullah.