Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 186 Hüküm no: 156 Orijinal metin no: [44b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Mahmud Efendi’nin kölesi Ali b. Abdullah’ı hayattayken azat etmiş olduğu Orta boylu gök elâ gözlü Rûsiyyü’l-asl râfi‘ü’l-kitâb Ali b. Abdullah nâm kimesne meclis-i şer‘-i hatîr-i lâzimü’t-tevkīrde mahmiye-i Galata tevâbi‘inden kasaba-i Tophâne’de mahalle-i Perizat sâkinlerinden iken bundan akdem vefât eden Mustafa Ağa b. Mahmud Efendi nâm müteveffânın sulbî kebîr oğlu İbrahim Ağa nâm emred-i bâliğ ve yine müteveffâ-yı mezbûrun sulbiye sagīre kızları Fâtıma ve Hatice’nin tesviye-i umûrlarına kıbel-i şer‘den mansûbe vasî ve vâlideleri Semenzâr bt. Abdullah nâm hâtun tarafından Ali Ağa b. Cafer Efendi ve Veli Beşe b. Ali nâm kimesneler şehâdetleriyle vekâleti sâbite olan fahrü’l-kuzât Mustafa Efendi b. Receb mahzarlarında takrîr-i da‘vâ edip abd-i memlûkü olduğumuz merhûm-ı mezbûr Mustafa Ağa hâl-i hayâtında ve kemâl-i akl-i sıhhatinde beni i‘tâk eylemiş idi, verese-i müteveffâ-yı mezbûrun eydi üzerimden kasr olunup hâlâ ıtkımı taleb ederim dedikde gıbbe’s-suâl [ve] akībe’l-inkâr müdde‘î-i mezbûr Ali’den sıdk-ı makāline mutâbıka beyyine taleb olundukda udûl-i ricâlden Ahmed Çelebi b. Sefer Çavuş ve el-Hâc Bey b. Abdullah nâm kimesneler li ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ müteveffâ-yı mezbûr Mustafa Ağa müdde‘î-i mezbûru hâl-i hayâtında ve kemâl-i akl-i sıhhatinde bizim huzûrumuzda âzâd eyledi biz bu husûsa bu vech üzere şâhidleriz ve şehâdet dahi ederiz deyû her biri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra mezbûr Ali’nin ıtkına hüküm birle mâ vaka‘a bi’t-taleb ketb olundu. Şuhûdü’l-hâl: Es-Sâbikūn.