Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 187 Hüküm no: 157 Orijinal metin no: [45a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Mahmud Efendi’nin kölesi Yusuf b. Abdullah’ı hayattayken azat etmiş olduğu Orta boylu kara gözlü sağ elinde eser-i cerâhati ve başında yara alâmeti olan bâ‘isü’l-kitâb Yusuf b. Abdullah nâm kimesne meclis-i şer‘-i hatîr-i lâzim[ü’t-tevkīrde] mahmiye-i Galata tevâbi‘inden kasaba-i Tophâne’de Perizat sâkinlerinden iken bundan akdem vefât eden Mustafa Ağa b. Mahmud Efendi nâm müteveffânın sulbî kebîr oğlu İbrahim Ağa ve yine sulbiye sagīre kızları Fâtıma ve Hatice’nin tesviye-i umûrlarına kıbel-i şer‘den mansûbe vasî ve vâlideleri Semenzâr bt. Abdullah nâm hâtun tarafından ber nehc-i şer‘î vekîl olan fahrü’l-kuzât Mustafa Efendi b. Receb nâm kimesneler mahzarlarında takrîr-i da‘vâ edip abd-i memlûkü olduğum mezbûr Mustafa Ağa hâl-i hayâtında ve kemâl-i sıhhatinde beni i‘tâk eylemiş idi, suâl olunup ıtkımı taleb ederim dedikde gıbbe’s-suâl [ve] akībe’l-inkâr müdde‘î-i mezbûrun da‘vâsına mutâbıka beyyine taleb olundukda udûl-i ricâlden Ahmed Çelebi b. Sefer Çavuş ve Hacı Bey b. Abdullah nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ müdde‘î-i mezbûru merhûm-ı mezbûr hâl-i hayâtında ve kemâl-i akl-i sıhhatinde bizim huzûrumuzda i‘tâk eyledi biz bu husûsa bu vech üzere şâhidleriz ve edâ-i şehâdet dahi ederiz deyû her biri edâ-i şehâdet-i şer‘iyye eylediklerinde mezbûr Yusuf’un ıtkına hüküm birle mâ vaka‘a bi’t-taleb ketb olundu. Hurrire fi’l-yevmi’l-hâmis ve’l-ışrîn min şehri Rebî‘ilevvel li sene isneteyn ve hamsîn ve elf. Şuhûdü’l-hâl: Es-Sâbikūn.