Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 187 Hüküm no: 158 Orijinal metin no: [45a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Es-Seyyid Ahmed Ağa b. Mehmed Ağa’nın varislerinin muhallefâttan olan ev hissesini es-Seyyid İbrahim Ağa b. Mehmed Ağa’ya satmaları Mahmiye-i Galata tevâbi‘inden kasaba-i Tophâne’de mahalle-i Cihangir sükkânından iken bundan akdem vefât eden es-Seyyid Ahmed Ağa b. Mehmed Ağa nâm müteveffânın sulbî sagīr oğlu Mehmed Çelebi ve sulbiye sagīre kızı Fâtıma’nın tesviye-i umûrlarına kıbel-i şer‘den mansûbe vasî ve vâlideleri olan seyyidetü’l-muhadderât Âişe bt. Ahmed Ağa nâm hâtun tarafından ber nehc-i şer‘î vekîli olan fahrü’l-akrân ve’l-a‘yân Mehmed Ağa b. Ahmed Ağa nâm kimesne meclis-i şer‘-i hatîr-i lâzimü’t-tevkīrde mahrûse-i Kostantıniyye’de el-Hâc Küçük sükkânından fahrü’l-emâsil ve’l-a‘yân râfi‘ü’l-kitâb es-Seyyid İbrahim Ağa b. Mehmed Ağa mahzarında bi’l-vekâle ikrâr ve i‘tirâf edip mahalle-i mezbûre el-Hâc Küçük’de vâki‘ bir tarafı mahalle-i mezbûre imâmına meşrûta menzile ve bir tarafı Süleyman Beşe nâm kimesne mülkü ve bir tarafı tarîk-i hâs ile mahdûd olup Yusuf Evi demekle ma‘rûf olan menzilde müteveffâ-yı mezbûr Ahmed Ağa’nın bir sehimi olup sehm-i mezbûru zarûret-i deyn için vekâlet-i mahkiyem hasebiyle müşârün-ileyh İbrahim Ağa’ya bin altı yüz nakd-i râyic fi’l-vakt akçeye bey‘-i kat‘îyle bey‘ edip kabz-ı semen ve teslîm-i müsemmen eyledim ba‘de’l-yevm sâlifü’z-zikr olan menzilin bir sehimini dahi keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i muharrer üzere cârî olan kelâmını el-mukarru lehü’l-merkūm İbrahim Ağa bi’l-muvâcehe tasdîk ve bi’l-müşâfehe tahkīk edicek, mâ vaka‘a bi’t-taleb ketb olundu. Hurrire fi’l-yevmi’s-sâdis ve’l-ışrîn min şehri Rebî‘ilevvel li sene isneteyn ve hamsîn ve elf. Şuhûdü’l-hâl: Fahrü’l-meşâyihi’l-kirâm Hasan Efendi b. Hüseyin Efendi, fahrü’l-eimmeti’l-kirâm el-Hâc Durak Efendi el-İmâm, fahrü’l-emsâl es-Seyyid Osman b. es-Seyyid Ahmed Ağa, fahrü’l-müderrisîn Receb Efendi b. Bektaş, fahrü’l-eimmeti’l-kirâm Hasan Efendi el-İmâm be Cihangir, fahrü’t-tüccâr İbrahim Çelebi b. Fethullah, Ömer Çelebi b. Ali Efendi, Rıdvan Dede b. Abdullah el-Kayyım, Mehmed b. Mustafa, Abdurrahman Bey [b.] Hüseyin.