Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 188 Hüküm no: 159 Orijinal metin no: [45b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffa es-Seyyid Ahmed Ağa b. Mehmed Ağa’nın boş arsadaki hissesinin borçlarına karşılık Durak Ağa’ya satılması Mahmiye-i Galata tevâbi‘inden olup kasaba-i Tophâne’de Cihangir [mahallesi] sükkânından iken bundan akdem vefât eden es-Seyyid Ahmed Ağa b. Mehmed Ağa nâm müteveffânın sulbî sagīr oğlu Mehmed Çelebi ve sulbiye sagīre kızı Fâtıma’nın tesviye-i umûrlarına kıbel-i şer‘den mansûbe vasî ve vâlideleri seyyidetü’l-muhadderât Âişe bt. Ahmed Ağa nâm hâtun tarafından husûs-ı âti’l-beyânı bey‘a vekîl olup vekâleti ber nehc-i şer‘î sâbite olan müvekkilem mezbûrenin li ebeveyn karındaşı fahrü’l-emsâl ve’l-akrân Mehmed Ağa b. Ahmed Ağa meclis-i şer‘-i hatîr-i lâzimü’t-tevkīrde, mahrûse-i Kostantıniyye’de el-Hâc Küçük [Mescid] mahallesinde sâkin kıdvetü’l-emâcid ve’l-ekârim câmi‘ü’l-mehâdim ve’l-mekârim hâlâ Çavuşbaşı olan Durak Ağa b. ( ) - dâme mecduhû - tarafından bey‘-i mezbûru tasdîka vekîl olup vekâleti ber nehc-i şer‘î sâbite olan fahrü’l-akrân ve’l-a‘yân müşârün-ileyh Durak Ağa’nın dâmâdı es-Seyyid İbrahim Ağa b. Mehmed Ağa nâm kimesne mahzarında bi’l-vekâle ikrâr ve i‘tirâf edip mahalle-i mezbûr el-Hâc Küçük Mescid’in kurbunda vâki‘ bir tarafı müşârün-ileyh Durak Ağa mülkü ve bir tarafı tarîk-i hâs ve bir tarafı tarîk-i âm ile mahdûd olan arz-ı hâliyede müteveffâ-yı mezbûr Ahmed Ağa’nın üç sehimden bir sehim hissesi olup zarûret-i deyni için bey‘i lâzım olmağla sehim-i mersûmu üç bin iki yüz nakd-i râyic fi’l-vakt akçeye vekâlet-i mahkiyem hasebiyle müşârün-ileyh Durak Ağa’ya bey‘-i kat‘îyle bey‘ edip kabz-ı semen ve teslîm-i müsemmen eyledim ba‘de’l-yevm sehim-i mezbûru dahi keyfe mâ yeşâ’ ve mâ yürîd sâir emlâki gibi mutasarrıf olsun dedikde, vekîl-i merkūm Mehmed Ağa’nın vech-i muharrer üzere cârî olan kelâmını vekîl-i mersûm İbrahim Ağa bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu. Hurrire fi’t-târihi’l-mezbûr li seneti’l-mezbûre. Şuhûdü’l-hâl: Es-Sâbikūn.