Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 189 Hüküm no: 160 Orijinal metin no: [45b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffa Rahîkizâde es-Seyyid Ahmed Ağa’nın evinin borçlarını ödemek üzere İbrahim Ağa’ya satılması Mahmiye-i Galata tevâbi‘inden kasaba-i Tophâne’de Cihangir mahallesinde sâkin iken bundan akdem vefât eden Rahîkīzâde es-Seyyid Ahmed Ağa b. Mehmed nâm müteveffânın verâseti zevce-i metrûkesi seyyidetü’l-muhadderât Âişe bt. Ahmed Ağa nâm hâtuna ve vâlidesi Râbia Hâtun bt. Mehmed’e ve sulbî sagīr oğlu Mehmed Çelebi’ye ve sulbiye sagīre kızı Fâtıma’ya münhasıra olup lâkin müteveffâ-yı mezbûrun mahalle-i mezbûrda vâki‘ mülk menzilinin muhavvata-i hâriciyyesi ki bir tarafı merhûm-ı merkūm Rahîkīzâde veresesinin beyninde müşterek olan iç evlerine ve bir tarafı Halil Ağa veresesi mülkü ve iki tarafı tarîk-i âm ile mahdûd olup iki bâb tahtânî evleri ve bir bâb fevkānî evi ve bir bâb büyük ve üç sofalı evi ve bir kahve odasını ve iki sofalı bir dehlizi ve bir ahırı ve bir su kuyusunu ve iki kenîfi ve eşcâr-ı müsmire ve gayr-ı müsmireyi müştemil bahçesinden gayrı mezbûr Ahmed Ağa’nın menkūlât kısmından deynini ihâta eder terekesi olmayıp medyûnen vefât etmekle zikr olunan menzil ma‘a bahçe bey‘ olunup ashâb-ı hukūka hakları îfâ olunması lâzım olmağın zarûret-i deyni için füruht olunmasına kıbel-i şer‘den izin verilip bey‘a arz olundukda iki kere yüz bin ve yirmi bin akçede karâr edip ziyâde ile tâlib-i âhar olmayıp ve semen-i mezbûr vakt-i akidde menzil-i merkūmun semen-i mislidir deyû udûl-i müslimînden cemm-i gafîr ve cem‘-i kesîr meclis-i şer‘a gelip her biri ihbâr ettiklerinde müteveffâ-yı mezbûrun sagīr oğlu merkūm Mehmed Çelebi’ye ve sagīre kızı mersûme Fâtıma’ya kıbel-i şer‘den mansûbe vasî ve vâlideleri merkūme Âişe Hâtun tarafından ber nehc-i şer‘î bey‘a vekîli olan li ebeveyn karındaşı fahrü’l-emâsil ve’l-akrân Mehmed Ağa b. Ahmed Ağa meclis-i şer‘-i hatîr-i lâzimü’t-tevkīrde, mahrûse-i Kostantıniyye’de mahalle-i el-Hâc Küçük [Mescid] sükkânından olup şerîf-i muhterem merkez-i dâire-i siyâdet nûr-ı hadîka-i Resûl-i ekrem râfi‘-i hâze’l-kitâb fahrü’l-emâsil ve’l-a‘yân İbrahim Ağa b. Mehmed Ağa mahzarında bi’l-vekâle ikrâr ve i‘tirâf edip müteveffâ-yı mezbûrun mahalle-i mezbûrede vâki‘ olup bâlâda hudûdu ve müştemilâtı tahrîr olunan menzilin zarûret-i deyni için bey‘i lâzım olmağla sûk-ı sultânîde bey‘ men yezîd [46a] tarîkiyle beyne’t-tâlibîn kirâren ve mirâren müzâyede olunup rağabât-ı nâs bi’l-külliye münkatı‘a oldukdan sonra müşârün-ileyh İbrahim Ağa üzerinde iki yük yirmi akçede karâr edip ziyâde ile tâlib-i âhar ve râgıb olmamağın zikr olunan menzil ve bahçeyi vekâlet-i mahkiyem hasebiyle merkūm İbrahim Ağa’ya ve iki yük yirmi bin akçeye bey‘-i kat‘îyle bey‘ edip onlar dahi vech-i meşrûh üzere iştirâ edip semeni olan meblağ-ı mezbûru sâlifü’z-zikr olan mersûm İbrahim Ağa yedinden bi’t-tamâm ve’l-kemâl ahz ü kabz eyleyip teslîm-i mebî‘ eyledim ba‘de’l-yevm menzil-i mezbûr mülk-i müşterâsıdır, keyfe mâ yeşâ’ ve yahtâr sâir emlâki gibi mutasarrıf olsun dedikde, vekîl-i merkūmun vech-i muharrer üzere cârî olan kelâmını el-mukarru lehü’l-merkūm İbrahim Ağa bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu. Hurrire fi’l-yevmi’s-sâdis ve’l-ışrîn min şehri Rebî‘ilevvel li sene isneyn ve hamsîn ve elf. Şuhûdü’l-hâl: Es-Sâbikūn.