Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 190 Hüküm no: 161 Orijinal metin no: [46a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı Kenan b. Abdullah’ın azat edilmesi Mahmiye-i Galata müzâfâtından olup Kuruçeşme sâkinelerinden iken bundan akdem vefât eden Fâtıma bt. İsmail Beşe nâm müteveffâtın verâseti ana anası Meleksimâ bt. Abdullah ve baba anası Sâime bt. Abdullah’a münhasıra olduğu zâhir ve mütehakkik oldukdan sonra mezbûretân Meleksimâ ve Sâime mahfil-i kazâda işbu râfi‘ü’l-vesîka orta boylu açık kaşlı gök ala gözlü kertlez Rûsiyyü’l-asl Kenan b. Abdullah mahzarında her biri ikrâr-ı tâm ve takrîr-i merâm edip mezbûr Kenan mûrisemiz müteveffât-ı mersûmenin abd-i memlûkü olup irs ile bize intikāl eylemiş iken her birimize isâbet eden hisse-i şâyi‘amızı hasbeten lillâhi’l-aliyyi’l-azîm ve taleben li merzâti’r-Rabbihi’l-kerîm cemî‘ mâlımızdan âzâd eyledik, ba‘de’l-yevm merkūm Kenan sâirü’l-ahrâri’l-asliyyîn gibi hür olup üzerinde her birimizin hakk-ı velâdan gayrı hakkı kalmadı dediklerinde, mukırretân-ı merkūmetânın vech-i muharrer üzere cârî olan ikrârlarını el-mukarru lehü’l-mersûm Kenan vicâhen tasdîk ve şifâhen tahkīk edicek merkūm Kenan’ın ıtkına hüküm birle mâ vaka‘a bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min şehri Rebî‘ilevvel li sene isneyn ve hamsîn ve elf. Şuhûdü’l-hâl: Mustafa Efendi b. Halil el-İmâm, Mehmed b. Murad, Ali Çelebi b. Ali Efendi, Mehmed Çelebi b. Ahmed, Hasan Ağa b. Abdullah, Mehmed b. Şaban, Hüseyin Beşe [b.] Abdullah, Ahmed Çelebi b. Mahmud, el-Hâc Mehmed b. Mahmud, İsmail b. Şaban, Mustafa b. A[bdullah].