Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 190 Hüküm no: 162 Orijinal metin no: [46a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı Rıdvan b. Abdullah’ın azat edilmesi Mahmiye-i Galata müzâfâtından olup Kuruçeşme nâm karye sâkinelerinden iken bundan akdem vefât eden Fâtıma bt. İsmail Beşe nâm müteveffâtın verâseti ana anası Meleksimâ bt. Abdullah ve baba vâlidesi Sâime bt. Abdullah’a münhasıra olduğu şer‘an zâhir ve mütebeyyin oldukdan sonra mezbûretân Melek ve Sâime mahfil-i kazâda işbu râfi‘ü’l-vesîka orta boylu açık kaşlı sol gözü mün‘adim Rûsiyyü’l-asl Rıdvan b. Abdullah mahzarında her birleri ikrâr-ı tâm ve takrîr-i merâm edip mezbûr Rıdvan mûrisemiz müteveffât-ı merkūmenin abd-i memlûkü olup irs ile bize intikāl eylemiş iken hâlâ her birimize isâbet eden hisse-i şâyi‘ayı hasbeten lillâhi’l-aliyyi’l-azîm ve taleben li merzâti Rabbihi’l-kerîm cemî‘ mâlımızdan âzâd eyledik, ba‘de’l-yevm merkūm Rıdvan sâir ahrâr-ı asliyyîn gibi [46b] hür olup üzerinde her birimizin hakk-ı velâdan gayrı hakkımız kalmadı dediklerinde, mukırretân-ı merkūmetânın vech-i muharrer üzere cârî olan ikrârlarını el-mukarru lehü’l-merkūm Rıdvan bi’l-muvâcehe tasdîk ve bi’l-müşâfehe tahkīk edicek mezbûr Rıdvan’ın ıtkına hüküm birle mâ vaka‘a bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min şehri Rebî‘ilevvel li sene isneyn ve hamsîn ve elf. Şuhûdü’l-hâl: Es-Sâbikūn.