Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 202 Hüküm no: 171 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mustafa Ağa b. Mahmud Efendi’ye ait evin borçlarına karşılık satıldığı Hilâl-i sutûrda mastûr husûsun mahallinde tahrîri için kıbel-i şer‘-i mutahhardan âdem iltimâs olunmağın bu fakīr zeyl-i kitâbda isimleri mastûr olan müslimîn ile mahmiye-i Galata tevâbi‘inden kasaba-i Tophâne’de mahalle-i Perizat’da vâki‘ menzil-i âti’l-beyânda akd-i meclis olundukda mahalle-i mezbûre sükkânından iken bundan akdem vefât eden Mustafa Ağa b. Mahmud Efendi nâm müteveffânın verâseti zevceteyn-i metrûketeyn Perizat bt. Abdullah ( ) nâm hâtunlara ve sulbiye-i sagīre kızları Fâtıma ve Hatice ve kebîre kızı Âişe’ye ve sulbî kebîr oğulları İbrahim Ağa ve Ahmed Ağa’ya münhasıra olduğu şer‘an mütehakkik oldukdan sonra müteveffâ-yı mezbûrun mahalle-i merkūme[de] vâki‘ bir tarafı mezbûr İbrahim Ağa mülkü ve bir tarafı tarîk-i hâs ve iki tarafı tarîk-i âm ile mahdûd olup cânib-i kıblîde bir bâb fevkānî büyük oda ve iki bâb küçük oda ve altında iki bâb dükkân ve fevkānî ve tahtânî küçük ve şimâle doğru gider tarîk tarafında beş sed ve mârrü’z-zikr büyük oda ve kurbunda iki bâb tahtânî odalar ve bir kiler ve fevkinde bir oda ve bir havuz ve bir köşk ve bir büyük oda ve bir su kuyusu ve bir ayazma ta‘bîr olunun ayn-ı cârî ve ma‘lûmü’l-kadr arsa kaldırımlı tarîk-i hâssı ve bir ahır ve atîk köşk ve dört sofa ve bir hamam ve câmekân ve bir matbah ve bir bâb fevkānî ve tahtânî çatma odaları müştemil mülk menzilinden gayrı menkūlât kısmından [50a] deynini ihâta eden terekesi olmayıp ve müteveffâ-yı mezbûr medyûnen vefât etmekle zikr olunan menzil bey‘ olunup ashâb-ı hukūka hakları îfâ olunması lâzım olmağın zarûret-i deyni için menzil-i mezbûrun bey‘ olunmasına kıbel-i şer‘den izin verilip bey‘a arz olundukda üç yük otuz bin akçede karâr edip ziyâde ile tâlibi olmayıp ve semen-i mezbûr vakt-i akidde menzil-i mezkûrun semen-i misli olduğuna udûl-i müslimînden cemm-i gafîr ve cem‘-i kesîr ihbâr eylediklerinde müteveffâ-yı mezbûrun sagīre kızları mezbûretân Fâtıma ve Hatice’nin tesviye-i umûrlarına kıbel-i şer‘den li ecli’t-tashîhi’d-da‘vâ mansûb vasî olan kıdvetü’l-kuzâti’l-islâm Yusuf Efendi b. Şaban nâm kimesne ve mezbûr İbrahim Ağa kendi tarafından asâleten meclis-i hatîr-i lâzimü’t-tevkīrde hâfızatü hâze’l-kitâb mersûme Semenzâr Hâtun mahzarında ikrâr ve i‘tirâf eden müteveffâ-yı mezbûrun mahalle-i mersûmede vâki‘ bâlâda hudûdu ve müştemilâtı tahrîr olunan menzili zarûret-i deyn için bey‘i lâzım olmağla sûk-ı sultânîde bey‘ men yezîd tarîkiyle beyne’t-tâlibîn kirâren ve mirâren müzâyede olunup rağabât-ı nâs bi’l-külliye münkatı‘ oldukdan sonra mezbûre Semenzâr Hâtun üzerinde üç yük elli bin akçede karâr edip ziyâde ile âhar tâlibi olmamağın zikr olunan menzil mezbûre Semenzâr Hâtun’a üç yük elli bin akçeye bey‘-i kat‘î ile bey‘ edip merkūme Semenzâr Hâtun dahi vech-i muharrer üzere iştirâ ettikden sonra semeni olan meblağ-ı merkūmu müşârün-ileyhâdan bi’t-tamâm ve’l-kemâl alıp kabz eyleyip teslîm-i mebî‘ eyledik, ba‘de’l-yevm sâlifü’z-zikr olunan menzili mersûme Semenzâr Hâtun sâir emlâki gibi keyfe mâ teşâ’ ve mâ türîd mutasarrıfa olsun dediklerinde sıhhat-i bey‘a hüküm birle mâ vaka‘a bi’t-taleb ketb olundu. Hurrire fi’l-yevmi’l-hâmis ve’l-ışrîn min şehri Rebî‘ilevvel li sene isneyn ve hamsîn ve elf. Şuhûdü’l-hâl: Kıdvetü’l-meşâyihü’l-kirâm eş-Şeyh Mustafa Efendi b. Sinan, Hacı Bey b. Abdullah, kıdvetü’l-emâsil ve’l-akrân Mahmud Ağa b. Ali Ağa, fahrü’l-kuzât Mustafa Efendi b. Receb, Davud Bey b. Abdullah el-Cündî, Mahmud Dede b. Ahmed, Mahmud b. İlyas.