Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 203 Hüküm no: 172 Orijinal metin no: [50a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meleksimâ bt. Abdullah ile Sâime bt. Abdullah arasındaki miras davasında sulh sağlandığı Mahmiye-i Galata tevâbi‘inden olup Kuruçeşme nâm karye sâkinelerinden iken bundan akdem vefât eden Fâtıma bt. İsmail Beşe nâm müteveffâtın verâseti ana anası Meleksimâ bt. Abdullah ve babası anası Sâime bt. Abdullah nâm hâtunlara münhasıra olduğu şer‘an mütebeyyine oldukdan sonra mezbûre Sâime mahfil-i kazâda râfi‘atü’l-kitâb merkūme Meleksimâ mahzarında bi’t-tav‘i’s-sâf ikrâr ve i‘tirâf edip merkūme Meleksimâ müteveffât-ı mezbûrenin muhallefâtına vâzı‘atü’l-yed olmağla müteveffât-ı mezbûreden bana isâbet eden nısf hisse-i şâyi‘amı merkūme Meleksimâ’dan taleb [ve] da‘vâ eylediğimde beynimizde münâza‘ât-ı kesîre vâkı‘a olmuş idi el-hâletü hâzihî beynimize müslimûn-ı muslihûn tavassut edip es-sulhu seyyidü’l-ahkâm fehvâsıyla amel edip kırk iki bin nakd-i râyic fi’l-vakt akçeye beni ıslâh edip ben dahi sulh-ı mezbûru kabûl ve bedel-i sulh olan meblağ-ı mezbûr kırk iki bin akçeyi merkūme Meleksimâ yedinden [50b] ahz ve kabz edip husûs-ı mezbûra müte‘allik zimmetini ibrâ-i âm ile ibrâ ve iskāt-ı tâm eyledim ba‘de’l-yevm husûs-ı mezbûra müte‘allik da‘vâ benden bi’l-asâle ve bi’l-vekâle sudûr ederse lede’l-hükkâmi’l-kirâm mesmû‘a ve makbûle olmasın dedikde mukırra-i mezbûrenin vech-i muharrer üzere cârî olan kelâmını el-mukarratü leha’l-merkūme Meleksimâ bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu. Tahrîren fi’l-yevmi’r-râbi‘ min şehri Rebî‘ilâhir li sene isneteyn ve hamsîn ve elf. Şuhûdü’l-hâl: Fahrü’l-eimme Mustafa Efendi b. Halil el-İmâm, Mehmed Beşe b. Şaban, Ahmed Çelebi b. Mehmed, Mustafa b. Abdullah, Hüseyin Beşe b. Abdullah, Süleyman Beşe b. Abdullah, Süleyman Beşe b. Sinan, Hasan Ağa b. Abdullah, Haydar b. Abdullah, Mehmed Çelebi b. Murad.