Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 204 Hüküm no: 173 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Mahmud Efendi veresesinin Hasan b. Abdullah’a ait ev konusunda müdahale etmemesi Mahmiye-i Galata’ya tâbi‘ kasaba-i Tophâne’de mahalle-i Perizat sâkinlerinden bâ‘isü’l-kitâb Hasan b. Abdullah nâm kimesne mahfil-i kazâda yine mahalle-i mezbûrede sâkin iken bundan akdem vefât eden Mustafa Ağa b. Mahmud Efendi nâm müteveffânın sagīre kızları Fâtıma ve Hatice’nin tesviye-i umûrları için kıbel-i şer‘îden mansûbe vasî vâlideleri Semenzâr bt. Abdullah Hâtun tarafından vekîli olup ber nehc-i şer‘î üzere vekâleti sâbite olan Mustafa Efendi b. Receb nâm kimesne ve müteveffâ-yı mezbûrun kebîr oğlu İbrahim Ağa b. el-mezbûr mahzarlarında takrîr-i da‘vâ edip mahrûse-i Manisa’da mahalle-i Derehamamı’nda vâki‘ el-Hâc Mehmed oğlu havlusu içinde vâki‘ tarafeyni debbâğhâne ve bir tarafı deve damına ve bir tarafı odasına ve bir tarafı tarîk-i âm ile mahdûd olan on bin akçe kıymetli menzilini müteveffâ-yı mezbûr Mustafa Ağa benim mülküm olmak üzere vasiyyet eylemişdir verese-i müteveffâ-yı mezbûr tasarrufuma mâni‘ olurlar suâl olunup mûcebiyle amel olunmasın taleb ederim dedikde, gıbbe’s-suâl ve akībe[’l-inkâr] müdde‘î-i mezbûr Hasan’dan da‘vâsına mutâbık beyyine taleb olundukda udûl-i ricâlden Ahmed Çelebi b. Sefer Çavuş ve Hacı Bey b. Abdullah nâm kimesneler li ecli’ş-şehâde hâzırân bi’l-meclis olup gıbbe’l-istişhâd fi’l-vâki‘ zikr olunan menzili müteveffâ-yı mezbûr Mustafa Ağa hâl-i hayâtında bizim huzûrumuzda merkūm Hasan’ın mülkü olmak üzere vasiyyet eyledi biz bu husûsa bu vech üzere şâhidleriz ve şehâdet dahi ederiz deyû herbirleri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukda verese-i müteveffâ-yı mezbûru merkūm Hasan’la bî-vech mu‘ârazadan men‘ birle mâ vaka‘a bi’t-taleb ketb olundu. Tahrîren fi’l-yevmi’s-sâmin ve’l-ışrîn min şehri Rebî‘ilevvel li sene isneyn ve hamsîn ve elf. Şuhûdü’l-hâl: İbrahim Kasım Çelebi b. ...? Bey, Ahmed Çavuş b. Mehmed, Mustafa b. Abdullah ve gayruhüm mine’l-hâzırîn.