Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 208 Hüküm no: 177 Orijinal metin no: [51b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Yusuf’un İbrahim Ağa b. Mustafa’yı vekil tayin ettiği Mahmiye-i Galata mahallâtından mahalle-i Câmi‘-i Kebîr’de sâkinelerinden seyyidetü’l-muhadderât Havva bt. Yusuf nâm hâtun tarafından husûs-ı âti’l-beyân[a] tevkîl-i ikrâra vekîl olup yine mahalle-i mezbûreden Mehmed Efendi b. Şaban el-İmâm ve Receb Çelebi b. Mehmed nâm kimesneler şehâdetleri ile vekâleti sâbite olan el-Hâc Ahmed b. Ali nâm kimesne mahfil-i kazâda yine mahalle-i mezbûreden râfi‘ü’l-kitâb fahrü’l-emâsil ve’l-akrân İbrahim Ağa b. Mustafa nâm kimesne mahzarında ikrâr ve i‘tirâf edip mezbûre Havva’nın zevci olup bundan akdem vefât eden Süleyman Bey b. Bayram nâm kimesne müteveffâdan isâbet eden rub‘u hisse-i şâyi‘asını ve mehr-i müeccelini ve sâir hakkını taleb ve da‘vâ ve ahz ve kabz ve kendiye îsâle mütevakkıf olan umûrda mezbûre Havva Hâtun müşârün-ileyh İbrahim Ağa’yı vekîl ve nefsiyçün nâib-i menâb eyledi dedikde merkūm İbrahim Ağa dahi vekâlet-i mezbûreyi kabûl ve hizmet-i lâzımesin edâya müte‘ahhid ve iltizâm eylemeğin mâ vaka‘a bi’t-taleb ketb olundu. Hurrire fi’l-yevmi’s-sâmin min şehri Rebî‘ilâhir li sene isneteyn ve hamsîn ve elf. Şuhûdü’l-hâl: Mehmed Çelebi b. İsa, Ramazan Efendi b. Mustafa, Mustafa Çelebi b. Mehmed, Mahmud b. İlyas.