Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 208 Hüküm no: 178 Orijinal metin no: [51b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Macar asıllı Mihayil v. Nikola’nın vasiyet yoluyla azat edilmiş olduğu İşbu râfi‘ü’l-kitâb orta boylu açık kır yağız Macariyyü’l-asl Mihayil v. Nikola nâm kimesne meclis-i şer‘-i hatîr-i lâzimü’t-tevkīrde mahmiye-i Galata’da Câmi‘-i Kebîr mahallesi sâkinlerinden iken bundan akdem vefât eden Süleyman Bey b. Mehmed nâm müteveffânın verâseti zevce-i metrûkesi Havva bt. Yusuf nâm hâtuna ve selâse-i erbâ‘ı beytülmâle âid olmağla mezbûre Havva tarafından ber nehc-i şer‘î vekîl olan İbrahim Bey b. Mustafa nâm kimesne ve mahmiye-i mezbûrede beytülmâl-i âmme ve hâssa emîni olan fahrü’l-akrân Ali Ağa b. el-Hâc Mehmed tarafından vekîl olan Fazlı Ağa mahzarlarında takrîr-i da‘vâ edip abd-i memlûkü olduğumuz mezbûr Süleyman Bey hâl-i hayâtında ve kemâl-i akl-i sıhhatinde beni tedbîr-i mutlak ile müdebber eylemiş idi, mezbûr Süleyman civâr-ı rahmet-i Hayy-i Kayyûm’a irtihâl ve intikāl edip muhallefâtının sülüs mâlı benim kıymetimi müsâ‘id olmağla cemî‘ mâlından âzâd olunmuşdur suâl olunup mûcebiyle amel olunmasın taleb ederim dedikde, gıbbe’s-suâl akībe’l-inkâr müdde‘î-i mezbûr Mihayil’den da‘vâsına mutâbık beyyine taleb olundukda udûl-i ricâlden Hızır Efendi b. Receb ve Hızır b. Hasan nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ müdde‘î-i mezbûr Mihayil’i müteveffâ-yı mezbûr Süleyman Bey bizim huzûrumuzda tedbîr-i mutlak edip hâlâ mezbûr Süleyman Bey vefât etmeğin müteveffâ-yı mezbûrun muhallefâtının sülüsü mezbûr İbrahim’in kıymetine müsâ‘id olmağla merkūm İbrahim müteveffâ-yı mezbûrun cemî‘ mâlından âzâd olmuşdur, biz bu husûsa şâhidleriz ve şehâdet dahi ederiz deyû her biri edâ-i şehâdet şer‘iyye eylediklerinde ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra mezbûr Mihayil’in ıtkına hüküm birle mâ vaka‘a bi’t-taleb ketb olundu. Cerâ zâlike. Ve hurrire fi’l-yevmi’s-sâlis min şehri Rebî‘ilâhir li sene isneteyn ve hamsîn ve elf. Şuhûdü’l-hâl: Mehmed Efendi el-İmâm, Receb b. Mehmed el-Müezzin, Ramazan Efendi b. Mustafa, Mahmud b. İlyas, Receb b. Abdullah.