Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 219 Hüküm no: 182 Orijinal metin no: [53b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Abdullah’ın oğlu Mehmed’in vasîsi İbrahim Ağa b. Mustafa’ya ücret takdiri Mahmiye-i Galata’ya tâbi‘ kasaba-i Beşiktaş mahallâtından Sinan Paşa mahallesinde sâkin iken bundan akdem vefât eden Hasan Bey b. Abdullah nâm müteveffânın sulbî oğlu Mehmed nâm sagīre vasiyy-i muhtâr olan işbu râfi‘ü’l-kitâb fahrü’l-akrân İbrahim Ağa b. Mustafa nâm kimesne meclis-i şer‘-i hatîr-i lâzimü’t-tevkīrde takrîr-i kelâm ve ta‘bîr ani’l-merâm edip vasiyy-i muhtâr olduğumuz sagīr-i merkūmun babası müteveffâ-yı mezbûrdan alâ tarîki’l-irsi’ş-şer‘î intikāl eden ma‘lûmü’l-kadr akçesin a‘mâl ve akārâtını dahi tâlibine îcâr ve gallesini cem‘de sebkat eden hizmetim mukābelesinde ücret ta‘yîn olunmak matlûbumdur dedikde, hâkim-i muvakki‘ü’l-kitâb vasiyy-i merkūma hizmet-i mezkûre mukābelesinde târih-i kitâb gününde yevmî beşer akçe ta‘yîn eyledikde vasiyy-i merkūm ücret-i mu‘ayyeneyi kabûl ve hizmet-i lâzımesin edâya ta‘ahhüd eylemeğin mâ vaka‘a gıbbe’t-taleb ketb olundu. Cerâ zâlike ve hurrire fî gurreti Cumâdelûlâ li sene selâse ve hamsîn ve elf. Şuhûdü’l-hâl: El-Hâc Murad b. Abdullah, Hüseyin b. Abdullah, Mehmed Çelebi b. Ramazan, Ramazan Efendi b. Mustafa, Abdülkerim Efendi el-Kadı, Mahmud b. İlyas.