Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 219 Hüküm no: 183 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamer Hâtun bt. Mahmud’un varislerine ait evin müzâyede ile satıldığı Mahmiye-i Galata’ya tâbi‘ kasaba-i Tophâne mahallâtından olup mahalle-i Fîruz Ağa sâkinelerinden iken bundan akdem vefât eden Kamer Hâtun bt. Mahmud nâm müteveffâtın verâsetinin nısfı zevc-i metrûkü Hüseyin Çorbacı b. Ali nâm kimesneye ve nısf-ı âharı beytülmâle âid olduğu şer‘an mütebeyyin oldukdan sonra mahmiye-i mezbûrede beytülmâl-i âmme ve hâssa emîni olan kıdvetü’l-emâcid ve’l-a‘yân Ali Ağa b. el-Hâc Mehmed nâm kimesne tarafından ber nehc-i şer‘î vekîl olan fahrü’l-akrân Mehmed Çelebi b. İsa nâm kimesne ve mezbûr Hüseyin Çorbacı mahfil-i kazâda râfi‘-i hâze’l-kitâb Mehmed Çelebi b. Ramazan nâm kimesne mahzarında bi’t-tav‘i’s-sâf her birleri ikrâr ve i‘tirâf edip müteveffât-ı mezbûre Kamer Hâtun’un muhallefâtından olup mahalle-i mezbûrede vâki‘ bir tarafı Hasan Çelebi mülkü ve bir tarafı Pâyidâr nâm hâtunun utekāsına vakf eylediği menzile ve bir tarafı Mehmed Reis b. Abdullah mülkü ve bir tarafı tarîk-i âm ile mahdûd olan bir bâb fevkānî ve bir bâb tahtânî beyti ve cüneyneyi ve bi’r-i mâyı ve kenîfi müştemil olan menzili bi cümleti’t-tevâbi‘ ve’l-levâhık kirâren ve mirâren müzâyede olunup rağabât-ı nâs bi’l-külliye münkatı‘a oldukdan sonra mezbûr Mehmed Çelebi üzerinde yirmi üç bin akçede karâr edip ziyâde ile tâlibi âharı olmamağın menzil-i mezbûru asâleten ve vekâleten merkūm Mehmed Çelebi’ye meblağ-ı merkūm yirmi üç bin akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen eyledik, ba‘de’l-yevm menzil-i merkūm mezbûr Mehmed Çelebi’nin mülk-i müşterâsıdır, keyfe mâ yeşâ’ ve yahtâr sâir emlâk gibi mutasarrıf olsun dediklerinde, mukırrân-ı mezbûrânın vech-i muharrer üzere asâleten ve vekâleten cârî olan kelâmlarını el-mukarru lehü’l-merkūm Mehmed Çelebi bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu. Hurrire fi’l-yevmi’s-sânî min Cumâdelûlâ li sene isneteyn ve hamsîn ve elf. Şuhûdü’l-hâl: Fahrü’l-emâcid ve’l-a‘yân Cafer Ağa b. Abdülmennân, Mustafa Çelebi b. Mehmed Çelebi el-İmâm, Mustafa Çelebi b. İsa el-Müezzin, el-Hâc Hasan Bölükbaşı b. el-Hâc Hasan, Ali b. Ahmed, Mehmed b. Şaban, Hüseyin b. Müstetâb, Ömer Beşe b. Şükrullah, Mehmed Çelebi b. Ramazan, Şükrullah b. Hasan, Mehmed Çelebi b. Ali, Mustafa Çelebi b. Mehmed Çelebi, Mehmed b. Yakub, Mehmed b. Ramazan, Mehmed Halîfe b. Hüseyin el-Müezzin, Mustafa b. İsa, Abdi b. Ali, Nasuh b. Mehmed, Ahmed Beşe b. Hüseyin el-Müezzin.