Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 220 Hüküm no: 184 Orijinal metin no: [54a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva Hâtun’un, ölen kocasında mehir alacağı kaldığı Udûlden Mehmed Çelebi b. Mahmud ve Receb Halîfe b. Ahmed el-Müezzin nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırân olup, mahrûse-i Galata’da vâki‘ beytülmâl-i âm ve hâssın emîni kıdvetü’l-emâcid ve’l-a‘yân Ali Ağa kıbelinden husûs-ı âti’z-zikre vekâleti bimâ hüve tarîkü’s-sübût şer‘an sâbit olan kıdvetü’l-emâsil ve’l-akrân Hâfız Yusuf Efendi b. Abdülmün‘im mahzarında, mahmiye-i Galata mahallâtından Câmi‘-i Kebîr mahallesinde sâkin iken bundan akdem fevt olan Süleyman Beşe b. Mehmed’in zevcesi ve vârisi seyyidetü’l-muhadderât Havva Hâtun bt. el-Hâc Yusuf kıbelinden bimâ hüve tarîkü’s-sübût şer‘an vekâleti sâbit olan fahrü’l-akrân İbrahim Ağa nâm kimesneden sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müvekkile-i mezbûre Havva’nın müteveffâ-yı mezkûrun zimmetinde nikâhında ma‘kūdun aleyh olan mehr-i müecceli cihetinden râyicü’l-vakt elli bin akçe-i cedîd hakkı vardır. Müdde‘iye-i mezbûreye meblağ-ı merkūmu sağlığında müteveffâ-yı mezkûrun kendisinden veya vekîlinden kısmen veya tamâmen almadığına, kendisine hibe etmediğine bi vechin mine’l-vücûh ve bi sebebin mine’l-esbâb zimmetini ibrâ etmediğine dâir yemîn billâh verildiğinde ve şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olduğunda hâkim-i muvakki‘ a‘lâhu şehâdetleri mûcebince meblağ-ı mezbûrun müteveffâ-yı mezkûrun muhallefâtından müdde‘iye-i merkūmeye edâsına hükm etti. Cerâ zâlike ve hurrire fi’l-yevmi’r-râbi‘ min Cumâdelûlâ sene isneyn ve hamsîn ve elf. Şuhûdü’l-hâl: Mehmed Efendi b. Mustafa Ağa, kıdvetü’l-akrân İbrahim Ağa b. Yusuf, el-Hâc Ali b. Ömer, el-Hâc Mehmed Beşe [b.] Murad, Abdülaziz Efendi [b.] Şaban el-İmâm, fahrü’l-akrân Musli Bey b. Ahmed, Mehmed b. Receb ve gayruhüm