Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 221 Hüküm no: 185 Orijinal metin no: [54b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat etmiş olan Abdurrahman Beşe b. Mehmed’e ait olan evin müzâyede ile satıldığı Mahalle-i Galata müzâfâtından kasaba-i Tophâne mahallâtından olup mahalle-i Sultan Cihangir sâkinlerinden iken bundan akdem vefât eden Abdurrahman Beşe b. Mehmed nâm râcilin zevce-i metrûkesi Râbia bt. Hasan nâm hâtundan gayrı zâhirde vâris-i ma‘rûfu olmayıp verâsetinin rub‘u mezbûre Râbia’ya ve selâse-i erbâ‘ı beytülmâle münhasıra olduğu şer‘an mütehakkik oldukdan sonra mahmiye-i mezbûrede zümre-i râcilin beytülmâl emîni olan fahrü’l-a‘yân ve’l-akrân Ahmed Ağa b. Mehmed Ağa nâm kimesne meclis-i şer‘-i hatîr-i lâzimü’t-tevkīrde râfi‘atü hâze’l-kitâb mezbûre Râbia mahzarında bi’t-tav‘i’s-sâf ikrâr ve i‘tirâf edip müteveffâ-yı mezbûrun muhallefâtından olup mahalle-i mezbûrede vâki‘ bir tarafı kalemkâr Hüseyin Çelebi mülkü ve bir tarafı Mustafa Reis b. el-Hâc İbrahim mülkü ve bir tarafı Behram Bey b. Abdullah mülkü ve bir tarafı tarîk-i âm ile mahdûd olup büyût-ı müte‘addide ve hamamı ve bahçeyi ve bi’r-i mâyı müştemil menzilini kirâren ve mirâren müzâyede olunup rağab[ât]-ı nâs bi’l-külliye münkatı‘a oldukdan sonra mezbûre Râbia üzerinde menzil-i merkūm yüz yetmiş bin akçeye karâr edip ziyâde ile tâlib-i âharı olmamağın menzil-i merkūm emânetim hasebiyle merkūme Râbia’ya meblağ-ı mezbûr yüz beş bin nakd-i râyic fi’l-vakt akçeye bey‘-i bâtt-ı sahîh-i şer‘îyle bey‘ edip kabz-ı semen ve teslîm-i müsemmen eyledim ba‘de’l-yevm sâlifü’z-zikr olan menzili merkūme sâir emlâki gibi keyfe mâ teşâ’ ve mâ türîd mutasarrıfa olsun dedikde, mukırr-ı merkūm Ahmed Ağa’nın vech-i muharrer üzere cârî olan kelâmını el-mukarru leha’l-merkūme Râbia Hâtun vicâhen tasdîk ve şifâhen tahkīk edicek sıhhat-i bey‘a hüküm birle mâ vaka‘a bi’t-taleb ketb olundu. Tahrîren fi’l-yevmi’l-hâmis min Cumâdelûlâ li sene isneyn ve hamsîn ve elf. Şuhûdü’l-hâl: Fahrü’l-müderrisîni’l-kirâm Hüseyin Efendi eş-şehîr bi Selânik, fahrü’l-eimmeti’l-kirâm Hasan Efendi b. Mehmed el-İmâm, Rıdvan b. Abdullah, fahrü’l-akrân Cafer Ağa, fahrü’ş-şüyûh Hasan Efendi b. Hüseyin.