Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 683 Hüküm no: 882 Orijinal metin no: [105a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Mehmed Efendi’nin evini Mehmed Ağa’ya sattığı (bey‘-i bi’l-vefâ) Husûs-ı âti’l-beyânın mahallinde tahrîri iltimâs olunmağın kıbel-i şer‘-i hatîrden irsâl olunan mevlânâ Mehmed Efendi b. Abdülbâkī sâbıkan sekbanbaşı olan Mefharü’l-emâcid ve’l-ekârim câmi‘ü’l-mehâsin ve’l-mekârim el-Hâc Mehmed Ağa b. el-merhûm Mustafa Ağa’nın Mahmiye-i İstanbul’da Hoşkadem mahallesinde sâkin olduğu menzile varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i hatîr eyledikde fi’l-asl vilâyet-i Anadolu’da medîne-i Manisa mahallâtından Karahisâr mahallesinden olup muvakkaten Tuzla kadısı olan Mehmed Efendi b. Ahmed meclis-i şer‘-i ma‘kūd-ı mezkûrda mûmâ-ileyh el-Hâc Mehmed Ağa mahzarında ikrâr ve takrîr-i kelâm edip zikr olunan Karahisâr mahallesinde vâki‘ bir tarafdan Mehmed Beşe mülkü ve bir tarafdan Ahmed Dede mülkü ve iki tarafdan tarîk-i âm ile mahdûd dâhilen ve hâricen büyût-ı adîde [ve] hadîkayı müştemil mülk menzilimi cümle hukūk ve merâfıkı ile mûmâ-ileyh el-Hâc Mehmed Ağa’ya târih-i kitâbdan üç yüz altmış gün tamâmına değin bey‘ bi’l-vefâ vechi üzre dört yüz esedî guruşa bey‘ ol dahi vech-i muharrer üzre iştirâ ve kabûl edip semeni olan meblağ-ı mezbûr dört yüz esedî guruşa mûmâ-ileyh el-Hâc Mehmed Ağa yedinden tamâmen ahz u kabz edip menzil-i mahdûd-ı mezkûru mahallinde zabt ve tasarrufa mûmâ-ileyh el-Hâc Mehmed Ağa’yı taslît eyledim dedikde gıbbe’t-tasdîk dergâh-ı âlî yeniçerilerinin elli yedinci ağa bölüğüne mahsûs odada hâlâ odabaşı olan Hüseyin Beşe b. Mustafa semen-i mezkûra ve menzil-i mezbûrun derkine emr [ve] kabûlü hâviye kefâlet-i sahîha-i şer‘iyye ile kefîl olmağın vâki‘ hâli mevlânâ-yı mezkûr mahallinde tahrîr ba‘dehû ma‘an irsâl olunan Mehmed b. Ramazan ile meclis-i şer‘a gelip alâ vukū‘ihî inhâ ve ihbâr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Es-Sâbikūn.