Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 684 Hüküm no: 883 Orijinal metin no: [105a-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mehmed b. Mehmed’in, Fransız Komarye v. Covaye’den yapağı bahasından alacaklı olduğu Mahrûse-i Galata’da Okçu Musa mahallesi sükkânından bâ‘isü’l-kitâb el-Hâc Mehmed b. Mehmed nâm kimesne dîvân-ı kāim[makām]-ı sadr-ı a‘zamîde akd olunan meclis-i şer‘-i şerîf-i lâzımü’t-teşrîfde Ceneviz elçisinin reisi olan Fransız Komarye v. Covaye ile tercümânları muvâcehesinde üzerine da‘vâ ve takrîr-i kelâm edip târih-i kitâbdan bir buçuk ay mukaddem dört yüz elli dokuz kantar yapağımın her bir kantarı beş esedî guruşa olmak üzre mezbûr Fransız Komarye’ye iki bin iki yüz doksan beş esedî guruşa be‘y ve teslîm edip ol dahi iştirâ ve kabûl ve tesellüm ettiğinden sonra semen-i mezbûrun bin yüz seksen guruşunu bana edâ edip bâkī bin yüz on beş esedî guruş hakkım zimmetinde kalmağla suâl olunup alıverilmek matlûbumdur dedikde gıbbe’s-suâl mezbûr Fransız Komarye cevâbında müdde‘î-i mezbûrdan dört yüz elli dokuz kantar yapağıyı semen-i mezbûra iştirâ ve tesellüm edip semeninden bin yüz seksen guruşunu edâ ettiğimden sonra müdde‘î-i mezbûrun görmek ile ma‘lûmu olan biri al ve biri mor ve biri gülgûnî üç pastav yüz elli zirâ‘ beynimizde ma‘lûm kumaşımın her zirâ‘ı üç tamâm ve bir rub‘ esedî guruşa olmak üzre dört yüz seksen yedi buçuk esedî guruşa mezbûr Hacı Mehmed’e bey‘ ol dahi görüp beğenip iştirâ eylemiş idi mezbûra Hacı Mehmed’e yapağı semeninden bâkī deynim olan bin yüz on beş esedî guruşun dört yüz seksen yedi buçuk guruşa takās olunduğu takdîrce müdde‘î-i mezbûra deynim ancak altı yüz yirmi yedi buçuk esedî guruş [105b] kalır deyicek gıbbe’s-suâl mezbûr Hacı Mehmed cevâbında mezbûr Fransız Komarye’nin zikr olunan kumaşı görmeden semen-i mezbûr dört yüz seksen yedi buçuk esedî guruşa iştirâ edip görüp beğenmeyip kabûl etmemiş idim deyicek, gıbbe’s-suâl mezbûr Fransız Komarye’den takrîr-i meşrûhunu mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr el-Hâc Mehmed’e zikr olunan kumaşları kable’l-iştirâ görmediğine ve ba‘de’l-iştirâ görüp kabûl etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ [etmeğin] mûcebince semen-i mezbûrdan bâkī bin yüz on beş esedî guruşu müdde‘î-i mezbûra edâya merkūm Fransız Komarye’ye tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Umdetü’s-sâlikîn eş-Şeyh İvaz Efendi b. Bekir, umdetü’l-erbâbi’t-tahrîr ve’l-kalem Mustafa Tezkireci-i Sânî, umdetü’l-a‘yân İsmail Ağa Serçavûşân, fahrü’l-emâsil ve’l-eşbâh Eyüb Ağa b. Ahmed Kethüdâ-yı hazret-i efendi, Hasan Çavuş el-Mübâşir.