Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 685 Hüküm no: 884 Orijinal metin no: [105b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Bey b. Mehmed’e satılan ev için Mehmed Ağa b. Mahmud’un, Ömer Kethüda b. Abdullah’ı vekil tayin ettiğinin ispat edildiği Mahmiye-i İstanbul’da Macuncu Kasım mahallesi sükkânından Karagöz demekle ma‘rûf Mehmed Ağa b. Mahmud nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bâ‘isü’l-kitâb Halil Bey b. Mehmed nâm kimesne mahzarında üzerine da‘vâ ve takrîr-i kelâm edip mahmiye-i mezbûrda Uzun Yusuf mahallesinde vâki‘ bir tarafdan Mustafa Çelebi mülkü ve bir tarafdan ( ) Ağa tasarrufunda olan vakıf menzil ve iki tarafdan tarîk-i âm ile mahdûd fevkānî ve tahtânî büyût-ı adîde ve ahır ve su kuyusu ve kenîfi müştemil olup mülküm olan menzilimi Ömer Kethüdâ b. Abdullah nâm kimesne bin altmış yedi senesi Cemâziyelâhiresi’nde benim iznimsiz fuzûlen mezbûr Halil Bey’e yirmi dokuz bin akçeye bey‘ ve teslîm ve kabz-ı semen edip mezbûr Halil Bey dahi iştirâ ve tesellüm etmekle mezbûr Halil Bey bi gayrı hakkın vaz‘-ı yed edip lâkin ben bey‘-i mezbûru mücîz olmadığım ecilden suâl olunup kasr-ı yedine ve bana teslîme mezbûr Halil Bey’e tenbîh olunmak matlûbumdur dedikde gıbbe’s-suâl mezbûr Halil Bey cevâbında müdde‘î-i mezbûr târih-i mezbûrdan mukaddem menzil-i mezbûru semen-i mezbûra bey‘ ve kabz-ı semene mezbûr Ömer Ağa’yı vekîl ve menâbına nâib nasb ve ta‘yîn edip mezbûr Ömer Ağa dahi bi’l-vekâle târih-i mezbûrda bana semen-i mezbûra bey‘ ve teslîm edip ve kabz-ı semen etmişidi deyû def‘le mukābele edicek gıbbe’s-suâl ve’l-inkâr mezbûr Halil Bey’den def‘-i mezbûru mübeyyine beyyine taleb olundukda zikr olunan Uzun Yusuf mahallesi sükkânından Mustafa b. Mustafa ve medîne-i Hazret-i Ebî Eyyûb-i Ensârî’de Davud Ağa mahallesi sükkânından Şaban b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olduklarında fi’l-hakīka müdde‘î-i mezbûr Mehmed Ağa târih-i mezbûrdan mukaddem menzil-i mahdûd-ı mezbûru bey‘ ve teslîm ve tarafından mezbûr Ömer Ağa’yı bizim huzûrumuzda vekîl ve menâbına nâib nasb ve ta‘yîn edip ol dahi ba‘de’l-kabûl menzil-i mezbûru bi’l-vekâle mezbûr Halil Bey’e semen-i mezbûra bey‘ ve teslîm ve kabz etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâli suâl için küttâb-ı mahkemeden Mehmed Efendi ve huddâm-ı mahkemeden Mehmed b. Ali irsâl olunup anlar dahi şâhidân-ı mezbûrânın mahallelerine varıp ahâlîsinden Yusuf b. Halil ve Mehmed b. Ali ve Mahmud b. Ahmed ve Hasan Efendi b. Hüseyin ve İmâm Mehmed Efendi b. Hüsrev ve müezzin Ahmed Çelebi b. Abdülvehhâb ve Mustafa Çelebi b. Mehmed ve Ramazan Çelebi b. Cafer ve Ali Çelebi b. Yunus ve Şaban Çelebi b. Abdullah ve Ahmed b. İbrahim nâm kimesnelerden şâhidân-ı mezbûrânın keyfiyyet-i hâlini suâl ettiklerinde her biri mahallesinde sâkin olan şâhid-i mezbûr için adl velev aleynâ makbûlü’ş-şehâdedirler deyû haber verdiklerini mevlânâ-yı mezbûr mahallinde tahrîr ba‘dehû mezbûr Mehmed ile meclis-i şer‘a gelip alâ vukū‘ihî inhâ ve takrîr etmeleri ile alenen ve ba‘dehû sırren ta‘dîl ve’t-tezkiyye olundukdan sonra şehâdetleri makbûle olmağın mûcebince müdde‘î-i mezbûr Mehmed Ağa vech-i mübeyyen üzre mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Fahrü’l-akrân Mehmed Çelebi b. ( ) Kethüdâ-yı muhzırân, Hasan Beşe b. Ali Çukadâr, İbrahim Çelebi b. Ahmed, Hasan Çelebi b. Ahmed, İbrahim b. Ahmed.