Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 686 Hüküm no: 885 Orijinal metin no: [105b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Odabaşı el-Hâc Bayezid Beşe’nin evini âzat ettiği Mülâyim bt. Abdullah ile oğlu Hasan’a sattığı Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi dergâh-ı âlî -dâme mahfûfen bi’l-me‘âlî- yeniçerinin dördüncü cemâ‘ati yoldaşlarına mahsûs odanın sâbıkan odabaşısı olan fahrü’l-akrân el-Hâc Bayezid Beşe b. Abdülmennân’ın mahmiye-i İstanbul’da Harrât Kemal mahallesinde vâki‘ menziline varıp zeyl-i rakīmde isimleri terkīm olan müslimîn mahzarlarında akd-i meclis-i şer‘-i mübîn eyledikde mezbûr el-Hâc Bayezid Beşe meclis-i ma‘kūd-ı mezbûrda işbu bâ‘iseyi’l-kitâb Mülâyim bt. Abdullah nâm mu‘takası ile mezbûre Mülâyim’in sadrî oğlu Hasan b. Abdullah nâm şâbb-ı emred mu‘takı mahzarlarında bi’t-tav‘i’s-sâf ikrâr edip bey‘-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan mukaddemâ zikri âtî menzilimin dâhiliyyesi olup zevce-i menkûham Emetullah Hâtun bt. Halil Ağa’ya bey‘ ve teslîm eylediğim menzil ve bir tarafdan mîralem Hüseyin Paşa mülkü ve bir tarafdan gallesi mahalle-i mezbûre mescid-i şerîfinde imâm olanlara meşrûta Arab Hacı Mehmed tasarrufunda olan menzil ve bir tarafdan tarîk-i âm ile mahdûd sâbıkan zevcem mezbûre Emetullah Hâtun’un menzilinin hâriciyyesi olup fevkānî iki bâb kebîr ve bir bâb sagīr odalar ve bir orta sofa ve bir ahır ve bir kenîf ve bir samanhâneyi müştemil olan menzili cemî‘ tevâbi‘ ve levâhıkı ve âmme-i hukūk ve merâfıkı ile tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile nakd-i râyic fi’l-vakt elli bin akçeye merkūmân Mülâyim ve Hasan’a ale’l-iştirâki’s-seviy bey‘ ve teslîm edip anlar dahi vech-i muharrer üzre iştirâ ve kabûl ve kabz ve tesellüm eylediklerinden sonra semen-i mezbûr elli bin akçeden mezbûrân Mülâyim ve Hasan’ın zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm menzil-i mahdûd mezbûrân Mülâyim ve Hasan’ın ale’l-iştirâki’s-seviy mülk-i müşterâları olup benim kat‘an alâka ve medhalim kalmamışdır dedikde gıbbe’t-tasdîki’ş-şer‘î husûs-ı mezbûru mevlânâ-yı mezbûr mahallinde tahrîr ba‘dehû ma‘an irsâl olunan Hasan Çelebi ile meclis-i şer‘-i hatîre gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Umdetü’l-eimme Seyfullah Efendi b. Osman, es-Seyyid Musa Efendi b. es-Seyyid Mehmed el-Müezzin, umdetü’l-müderrisîn Numan Efendi b. Mustafa, fahrü’l-eşbâh el-Hâc Süleyman [b.] Abdullah, Hüseyin b. Hasan, Ali b. Mehmed, Mehmed b. Şaban.