Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 687 Hüküm no: 886 Orijinal metin no: [105b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Odabaşı el-Hâc Bayezid Beşe’nin evini karısı Emetullah Hatun bt. Halil Ağa’ya satıp parasını yine karısı Emetullah’a hibe ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi dergâh-ı âlî -dâme mahfûfen bi’l-me‘âlî- yeniçerilerinin dördüncü cemâ‘ati yoldaşlarına mahsûs odanın sâbıkan odabaşısı olan fahrü’l-akrân el-Hâc Bayezid Beşe b. Abdülmennân’ın mahmiye-i İstanbul’da Harrât Kemal mahallesinde vâki‘ menziline varıp zeyl-i rakīmde isimleri terkīm olunan müslimîn mahzarlarında akd-i meclis-i şer‘-i mübîn eyledikde mezbûr el-Hâc Bayezid Beşe meclis-i ma‘kūd-ı mezbûrda zevce-i menkûhası Emetullah Hâtun bt. Halil Ağa tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân olup dergâh-ı âlî yeniçerilerinin yirmi beşinci ağa bölüğü yoldaşlarına mahsûs odanın hâlâ odabaşısı olan Mustafa Çelebi b. Mahmud ve Yusuf Bey b. Hüseyin nâm kimesneler şehâdetleriyle şer‘an sâbit olan fahrü’l-akrân Mustafa Ağa b. Ebûbekir mahzarında bi’t-tav‘i’s-sâf ikrâr ve i‘tirâf edip bey‘-i âti’l-beyânın sudûruna değin yedimde mülküm ve hakkım olup mahalle-i mezbûrda vâki‘ bir tarafdan Mumcu Mehmed Çelebi mülkü ve bir tarafdan mîralem Hüseyin Paşa mülkü ve bir tarafdan gallesi mahalle-i mezbûre mescid-i şerîfinde imâm olanlara meşrûta Arab Hacı Mehmed tasarrufunda olan menzil ve bir tarafdan tarîk-i âm ile mahdûd dâhiliyyesinde tabaka-i ulyâda iki oda ve bir orta sofa ve bir kenîf [106a] ve tabaka-i vustâda bir oda ve dehliz ve tabaka-i süflâda kiler ve bir matbah ve bir kenîf ve bir su kuyusu ve cüneyneyi ve hâriciyyesinde fevkānî iki bâb kebîr ve bir bâb sagīr odalar ve bir orta sofa ve bir ahır ve bir kenîf ve bir samanlık odasını müştemil olan işbu menzilimin dâhiliyye-i müfrezesini cemî‘ tevâbi‘ ve levâhıkı ve âmme-i hukūk ve merâfıkı ile tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile seksen bin râyic fi’l-vakt akçeye zevcem müvekkilem mezbûre Emetullah Hâtun’a bey‘ ve teslîm edip ol dahi iştirâ ve kabûl ve tesellüm eyledikden sonra semeni olan meblağ-ı mezbûr seksen bin akçeyi zevcem müvekkile-i mezbûr Emetullah Hâtun’a hibe-i sahîha-i şer‘iyye ile hibe edip ol dahi ittihâb ve kabûl eyledi ba‘de’l-yevm menzil-i mahdûd-ı mezbûrun dâhiliyyesi zevcem müvekkile-i mezbûre Emetullah’ın mülk-i müşterâsı olup kat‘â alâka ve medhalim kalmamışdır dedikde gıbbe’t-tasdîki’ş-şer‘î husûs-ı mezbûru mevlânâ-yı mezbûr mahallinde tahrîr ve ba‘dehû ma‘an irsâl olunan Hasan Çelebi ile meclis-i şer‘-i hatîre gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Es-Sâbikūn.