Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 267 Hüküm no: 227 Orijinal metin no: [67a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Varissiz vefat eden Ahmed Beşe b. İsmail’in mallarının beytülmâle kaldığı Mahmiye-i Galata dâhilinde Câmi‘-i Kebîr mahallesinde sâkin iken bundan akdem vefât eden Ahmed Beşe b. İsmail nâm müteveffânın zâhirde vâris-i ma‘rûfu olmamağla verâseti beytülmâle âid ve râci‘ olmağın mahmiye-i mezbûrede beytülmâl-i âmme ve hâssa emîni olan fahrü’l-akrân Ali Ağa tarafından ber nehc-i şer‘î vekîl olup vekâleti sâbite olan Mustafa Çelebi b. Yakub meclis-i şer‘-i hatîr-i lâzimü’t-tevkīrde işbu bâ‘isü’l-kitâ[b] Muharrem Beşe b. Nasuh mahzarında ikrâr ve i‘tirâf edip müteveffâ-yı mezbûrun muhallefâtından olup Bereketzâde mahallesinde vâki‘ bir tarafı Yazıcıoğlu mülküne ve bir tarafı Zâhide Hâtun mülküne ve bir tarafı Ali Reis mülküne ve bir tarafı tarîk-i âm ile mahdûd bir bâb fevkānî ve bir tahtânî ve sofayı müştemil olan menzili sûk-ı sultânîde bey‘-i men yezîd olup rağabât-ı nâs bi’l-külliye münkatı‘a oldukdan sonra mezbûr Muharrem Beşe üzerinde on bin cedîd akçeye karâr edip ziyâde ile tâlib-i âharı olmamağın menzil-i merkūmu vekâletim hasebiyle mezbûr Muharrem Beşe’ye meblağ-ı mezbûr on bin nakd-i râyic fi’l-vakt akçeye bey‘-i bâtt-ı sahîh-i şer‘ile bey‘ edip kabz-ı semen ve teslîm-i müsemmen eyledim ba‘de’l-yevm sâlifü’z-zikr olan menzil-i merkūmu mezbûr Muharrem Beşe sâir emlâki gibi keyfe mâ yeşâ’ ve mâ yürîd mutasarrıf olsun dedikde mukırr-ı merkūm Mustafa Çelebi’nin vech-i muharrer üzere cârî olan kelâmını el-mukarru lehü’l-merkūm Muharrem Beşe vicâhen tasdîk ve şifâhen tahkīk edicek sıhhat-i bey‘a hüküm birle mâ vaka‘a bi’t-taleb ketb olundu. Cerâ zâlike ve hurrire fi’l-yevmi’l-hâmis min şehr-i Ramazâni’l-mübârek sene isneyn ve hamsîn ve elf. Şuhûdü’l-hâl: Ramazan Efendi b. Mustafa, Hasan Çavuş b. İbrahim, Halim Beşe b. İslâm, Halil Çelebi b. Mehmed, Sinan b. Abdullah, Ahmed Beşe b. Hamza el-Münâdî, Mustafa b. Musa, Musa Efendi b. Mahmud.