Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 689 Hüküm no: 888 Orijinal metin no: [106a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Malkoç v. Kirkor’un, evini es-Seyyid Ali Çelebi b. es-Seyyid Abdülvehhâb’a sattığı Mahmiye-i İstanbul’da Kâtib mahallesinde sâkin tüccâr tâifesinden Malkoç v. Kirkor nâm zimmî meclis-i şer‘-i şerîf-i Ahmedî ve mahfil-i dîn-i münîf-i Muhammedî’de gılmân-ı hâssadan zülüflüler odabaşısı olan umdetü’l-emâcid ve’l-akrân bâ‘isü’l-kitâb Ali Ağa b. Abdülvehhâb tarafından husûs-ı âti’l-beyâna vekîl olduğu es-Seyyid Ali Çelebi b. es-Seyyid Mehmed ve Ahmed Bey b. Abdullah nâm kimesne[ler] şehâdetleri [ile] şer‘an vekâleti sâbit olan Receb Ağa b. Mahmud mahzarında ikrâr ve takrîr-i kelâm edip akd-i âtînin sudûruna değin yedimde mülküm ve hakkım olup mahmiye-i mezbûrda Ahırkapı kurbunda Kapıağası Mahmud Ağa mahallesinde vâki‘ bir tarafdan Çeşmisiyah menzili ve bir tarafdan Halil Ağa menzili ve bir tarafdan Mahmud Paşa menzili ve bir tarafdan tarîk-i âm ile mahdûd dâhiliyyesinin tabaka-i ulyâsında iki bâb oda ve tahta-pûş üzerinde sofa ve tabaka-i vustâsında bir kebîr oda ve bir orta sofa ve bir mâbeyn odası ve bir matbah ve tabaka-i süf[lâ]sında bir kiler ve kenîf ve bahçeyi ve hâriciyyede iki bâb fevkānî oda ve bir ahır ve kenîfi müştemil menzilimi cümle tevâbi‘ ve levâhıkı ve kâffe-i hukūk ve merâfıkı ile müvekkil-i mûmâ-ileyhe tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bin sekiz yüz yirmi beş esedî guruşa bey‘ ve teslîm edip ol dahi iştirâ ve tesellüm ettiğinden sonra semen-i mezbûru yedinden tamâmen ahz u kabz eyledim min ba‘d menzil-i mahdûd-ı mezbûr müvekkil-i mûmâ-ileyhin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek li sene seb‘ ve seb‘în ve elf. Şuhûdü’l-hâl: Mehmed Efendi el-İmâm, umdetü’l-eşbâh kapıcıbaşı Mehmed Ağa, Receb Ağa b. Abdullah, el-Hâc Mustafa, Hoca Mehmed Efendi, Mehmed Çelebi b. Abdullah.