.:: İstanbul Kadı Sicilleri ::.


Bab Mahkemesi 3 Numaralı Sicil (H. 1077 / M. 1666 - 1667)
cilt: 17, sayfa: 689
Hüküm no: 889
Orijinal metin no: [106a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sodli v. Fransız’ın koyunlarına el koyan Kola v. Dimo’dan ya aynını ya da bedelini tazmin etmesi gerektiği

Sürekçi tâifesinden bâ‘isü’l-kitâb Sodli v. Fransız nâm zimmî meclis-i şer‘-i şerîf-i lâzımü’t-teşrîfde tâife-i mezbûrdan Kola v. Dimo nâm zimmî muvâcehesinde üzerine da‘vâ ve takrîr-i kelâm edip bundan Boğdan beyi olan Duka Voyvoda’dan semen-i ma‘lûma iştirâ ve kabz ettiğim bin iki yüz elli re’s koyunumu çobanım Piyo nâm zimmî diyâr-ı Boğdan’da Falcıköyü nâm karye kurbunda bir mahalde ra‘y eder iken mezbûr Kola zikr olunan koyunlarımı fuzûlen ahz u kabz etmişdir suâl olunup ihkāk-ı hak olunmak matlûbumdur dedikde gıbbe’s-suâl mezbûr Kola cevâbında merkūm Duka Voyvoda’dan sonra Boğdan voyvodası olan Liyasko Voyvoda bana bin iki yüz elli re’s koyun bey‘ edip elime bir kağıd verip ben dahi mahall-i mezbûrdan bin iki yüz elli re’s koyun bulup mezbûr Liyasko’nun olmak üzre alıp İstanbul’a getirip bey‘le ile istihlâk etmişdim, lâkin müdde‘î-i mezbûrun olduğu ma‘lûmum değildir deyû inkâr edicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz etmekle istihlâf etmeğin müdde‘î-i mezbûrun vech-i muharrer üzre mahall-i mezbûrda olan bin iki yüz elli re’s koyununu fuzûlen ahz etmeyip elân üzerine ayânını red ya kıymet-i şer‘iyyelerini zamân lâzım olmadığına mezbûr Kola’ya yemîn teklîf olundukda mezbûr Kola yemînden nükûl etmeğin mûcebince zikr olunan bin iki yüz elli re’s koyun mevcûd ise ba‘de ahzi’l-me’ûne a‘yânını müdde‘î-i mezbûra teslîme, müstehlek ise mahall-i mezbûrede olan kıymet-i şer‘iyyelerini ba‘de’s-sübût müdde‘î-i mezbûra zâmin olmak üzre merkūm Kola’ya tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene seb‘a ve seb‘în ve elf.


Şuhûdü’l-hâl: Mehmed Çelebi b. Abdülmennân, Hasan Çelebi b. Ahmed, Veli Beşe b. Mahmud, Mehmed Beşe b. Ramazan, Baba Resul [b.] Rıdvan.