Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 690 Hüküm no: 890 Orijinal metin no: [106a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tarakçı Mustafa b. Receb’in geçerli nizama uygun olmaksızın kaşık alıp satmasının engellenmesi Mahmiye-i İstanbul’da tarakçılar hırfetinin kethüdâsı Receb b. Sâlih ve yiğitbaşıları Mehmed b. Ali ve ihtiyârlarından İvaz b. Ahmed ve Mehmed b. Satılmış ve Ali b. Osman ve Pîrî b. Mustafa ve Şaban b. Mehmed ve Receb b. Musli ve Musa b. Hüseyin ve sâirleri meclis-i şer‘-i şerîf-i lâzımü’t-teşrîfde kaşıkçı tâifesinden Mustafa b. Receb mahzarında her biri üzerine da‘vâ ve takrîr-i kelâm edip bizim metâ‘ımız olan çimşir ve ablak-ı yeni dünyâ ve sandal ağacı ve fildişi ve bağa, taşradan İstanbul’a geldikde kaşıkçı tâifesinin kethüdâları ve sâir ihtiyârları ile beynimizde taksîm edegelmişken mezbûr Mustafa zikr olunan metâ‘ı bizden hafiyyeten alıp hakkâklik edip sâir kaşıkçılara satmağın beynimizde ihtilâle bâ‘is olmuşdur suâl olunup men‘ olunması matlûbumuzdur dediklerinde gıbbe’s-suâl mezbûr Mustafa cevâbında kaziyye minvâl-i muharrer üzre olduğunu bi tav‘ihî ikrâr etmeğin mûcebince husûs-ı mezbûr kadîmden olageldiği üzre olup ehad-i tarafeynden biri kadîme mugāyir iş etmemek üzre merkūm Mustafa’ya tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: İbrahim Çelebi b. Ahmed, Veli Beşe b. Mahmud, Baba Resul b. Rıdvan, Mehmed Beşe b. Ramazan.