Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 691 Hüküm no: 891 Orijinal metin no: [106a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hacı Yusuf’un, Medine-i Münevvere Vakfı’na ait evi mütevelli izni ile Rahime bt. Ali’ye vefa yoluyla sattığına dair açtığı davada tarafına mühlet verildiği Mahmiye-i İstanbul’da Kesmekaya kurbunda sâkine Fâtıma bt. Hacı Yusuf nâm hâtun meclis-i şer‘-i şerîf-i Ahmedî ve mahfil-i dîn-i münîf-i Muhammedî’de Rahime bt. Ali nâm hâtun ile Medîne-i Münevvere [vakfı] mütevellîsi vekîli mahzarlarında da‘vâ ve takrîr-i kelâm edip vakf-ı mezbûrdan olup mahmiye-i mezbûrda Kirmasti mahallesinde vâki‘ icâreteyn-i ma‘lûmeteyn ile tasarrufumda olan ma‘lûmü’l-hudûd menzilimin hakk-ı tasarrufu târih-i kitâbdan üç sene mukaddem [106b] merkūme Rahime’ye tefvîz bi’l-vefâ ve izn-i mütevellî ile yirmi dokuz bin akçe bedel mukābelesinde ferâğ ve tefvîz ve teslîm edip ol dahi vech-i muharrer üzre tefevvuz ve tesellüm edip bedel-i mezbûrun dokuz bin akçesini bana def‘ ve teslîm edip ben dahi ahz u kabz etmişidim hâlâ suâl olunup bedel-i mezbûrdan makbûzumu ahz ve menzil-i mezbûru bana teslîme mezbûre Rahime’ye tenbîh olunmak matlûbumdur dedikde gıbbe’s-suâl mezbûre Rahime cevâbında müdde‘iyye-i mezbûre menzil-i mezbûru bedel-i mezbûr yirmi dokuz bin akçe mukābelesinde izn-i mütevellî ve tefvîz-i kat‘î ile bana tefvîz edip bedel-i mezbûrun cümlesini benden ahz ve istîfâ etmişidi deyip tefvîz-i mezbûrun vefâ olduğunu inkâr edicek gıbbe’s-suâl ve’l-inkâr müdde‘iyye-i mezbûreden tefvîz-i mezbûr vefâ olduğuna ve mezbûre Rahime’den bedel-i mezbûrun cümlesini edâ ettiğine beyyine taleb olundukda her biri ikāmet-i beyyine için istimhâl etmekle mehl-i şer‘î ile imhâl olunmağın mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: İbrahim Çelebi b. Halil, müezzin Mehmed Çelebi b. ( ), Ali Efendi el-İmâm, Mehmed b. Mustafa.