Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 691 Hüküm no: 892 Orijinal metin no: [106b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ali b. Ali’nin, Hasan Beşe b. Abdullah ve üç farklı kişiyle ortak oldukları kasap işinde ettikleri zararın miktarlarının belirlenip kaydedildiği Husûs-ı âti’l-beyânın mahallinde tahrîri iltimâs olunmağın kıbel-i şer‘den irsâl olunan mevlânâ Mehmed Efendi b. Abdülbâkī bi’l-fi‘l koyun emîni vekîli olan Mustafa Ağa’nın Mahmiye-i İstanbul’da Sancakdâr Hayreddin mahallesinde sâkin olduğu menzile varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i hatîr eyledikde kasab tâifesinden Hacı Ali b. Ali nâm kimesne meclis-i ma‘kūd-ı mezbûrda şerîki Hasan Beşe b. Abdullah mahzarında takrîr-i kelâm ve ta‘bîr ani’l-merâm edip bundan akdem mezbûr Hasan Beşe ve karındaşı hâzır bi’l-meclis İbrahim ve gāibân ani’l-meclis Panayot ve Yanaki ile hâsıl olacak fâide ve nemâ beynimizde beş buçuk hisse olup bir buçuk hissesi bana ve bir hissesi merkūmûna isâbet etmek üzre akd-i şirket edip on sekiz ay bu minvâl üzre şerîkler olup hâlâ fesh-i akd-i şirket edip beynimizde yazıcı defteri mûcebince hesâb gördüğümüzde ba‘de külli hesâb yüz yedi bin iki yüz akçe zararımız olup meblağ-ı mezbûrdan benim hisseme otuz yedi bin beş yüz akçe ve mezbûr Hasan Beşe’nin hissesine yirmi beş bin akçe isâbet etmişidi hâlâ mezbûr Hasan Beşe’den suâl olunup takrîri tahrîr olunması matlûbumdur dedikde gıbbe’s-suâl mezkûr Hasan Beşe kaziyye bâlâda tafsîli mürûr ettiği vech üzre olup zikr olunan yüz otuz yedi bin iki yüz akçeden kendi hissesine yirmi beş bin akçe isâbet ettiğini ikrâr etmeğin vâki‘ hâli mevlânâ-yı mezbûr mahallinde tahrîr ve ba‘dehû irsâl olunan İbrahim Çelebi b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mustafa Ağa b. ( ), İbrahim Bey b. Ömer, Hüseyin Beşe b. Abdullah, Ali b. Mehmed, Yusuf b. Abdullah, Mehmed Çelebi b. Abdullah.