Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 63 Hüküm no: 23 Orijinal metin no: [4b-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asiye bt. Yusuf ile kocası Abdullah’ın anlaşarak boşandığı (muhâla‘a) Medîne-i mahmiye-i Kostantıniyye’de vâki‘ Sultan Süleyman Han -aleyhi’r-rahmetü ve’r-rıdvân- Câmi‘i kurbünde sâkine Asiye bt. Yusuf nâm hatun meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzıra olup sâhib-i hâze’l-kitâb Abdullah b. Seyfullah nâm zevci ile muhâla‘a etti. Zevc-i mezbûr dahi nikâhında ma‘kūdün-aleyh râyicü’l-vakt beş yüz akçe mehr-i müecceli, nafaka-i iddeti ve meûnet-i süknâsı mukābelesinde zevce-i mezbûresi ile hul‘ eyledi. Mezbûre Asiye bu sûretle akd-i cedîd ve mehr-i müste’nif olmadan zevc-i mezkûra helâl olmayacak şekilde bâyinen ayrılmış oldu. Sonra hukūk-ı zevciyyete müte‘allik cemî‘ de‘âvîden her biri diğerinin zimmetini ibrâ-yı âmm-ı kātı‘un li’n-nizâ‘ ile ibrâ etti. Cerâ zâlike ve hurrire fi’l-yevmi’l-hâmis ve’l-ışrîn min-şehri Recebi’l-ferd li-sene selâse ve sittin ve elf. Şuhûdü’l-hâl: es-Seyyid Mehmed Efendi b. es-Seyyid Ali, Şeyh Mehmed Çelebi b. Musa, Hasan Çelebi b. Kanber, Hüseyin b. Pîrî, Rıdvan Beşe b. Abdullah ve gayruhum mine’l-huzzâr