Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 692 Hüküm no: 893 Orijinal metin no: [106b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey b. el-Hâc Hasan’ın babası el-Hâc Hasan’ın taş ve bıçakla yaralanıp öldürüldüğü iddiasını ispat edemediği Vilâyet-i Anadolu’da Bolu sancağında olan ( ) kazâsına tâbi‘ Göynükviran nâm karye sükkânından Hüseyin Bey b. el-Hâc Hasan nâm kimesne meclis-i şer‘-i hatîrde işbu ashâbü’l-kitâb Veli b. Receb ile sulbî kebîr oğlu Ali ve zevcesi Hâcce Hâtun bt. Züfer nâm kimesneler mahzarlarında üzerlerine da‘vâ ve takrîr-i kelâm edip mezbûrûn Veli ve Ali ve Hâcce Hâtun târih-i kitâbdan bir sene mukaddem karye-i mezbûrede benim babam mezbûr el-Hâc Hasan’ı amden hacer-i kebîr ve bıçak ile vurup cerh edip andan nâşî müte’essiren fevt olmuşidi hâlâ mezbûrûndan suâl olunup mûcebi icrâ olunmak murâdımdır dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin merkūmûn Veli ve Ali ve Hâcce Hâtun’dan her birine müdde‘î-i mezbûrun babası mezbûr el-Hâc Hasan’ı vech-i muharrer üzre hacer-i kebîr ve bıçak ile vurup cerh etmediklerine yemîn teklîf olundukda anlardan her biri dahi [alâ] vefki’l-mes’ûl yemîn billâhi te‘âlâ eylemeğin mûcebince müdde‘î-i mezbûr bilâ-beyân mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâdis aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: Receb Ağa [b.] Mehmed, Osman Ağa b. Hüseyin, Mehmed Çelebi b. Abdülbâkī, Hüseyin b. Ali, Mustafa b. Sâlih.