Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 693 Hüküm no: 894 Orijinal metin no: [106b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Osman b. Ali’nin, Abdullah Beşe b. İbrahim’deki zağferan bahasından alacağının tahsil edilip vârislerine verilmesi Fi’l-asl vilâyet-i Anadolu’da Trabzon kazâsına [tâbi‘] Akçakale nâm karye ahâlîsinden olup vilâyet-i Rumeli’nde kasaba-i Varna’da ticâret üzre iken fevt olan Osman b. Ali’ye li eb ihveteyn ve li üm kız karındaşları Fâtıma Hâtun bt. Ramazan tarafından husûs-ı âti’l-beyâna vekâletin iddi‘â eden Mehmed nâm kimesne mahfil-i kazâda mahrûse-i Galata’ya tâbi‘ kasaba-i Kasımpaşa mahallâtından Kulaksız mahallesi sâkinlerinden Abdullah Beşe b. İbrahim nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr benim li ebeveyn karındaşım ve mezbûre Fâtıma’nın li üm karındaşı olup müteveffâ-yı mezbûr ile benim babamın adı Ali ve mezbûre Fâtıma’nın babası adı Ramazan ve anamız adı Sâliha ve maskat-ı re’simiz karye-i mezbûre olup müteveffâ-yı mezbûrun verâseti benim ile mezbûre Fâtıma’ya münhasıra iken mezbûr Abdullah Beşe hâlâ kâsid ve eydî-i nâsdan münkatı‘ olup esedî yüz otuz akçeye râyic olan akçe ile müteveffâ-yı mezbûrun zağferan semeninden zimmetinde hakkı olan dokuz bin altı yüz akçeyi bana teslîmden imtinâ‘ eder suâl olunup meblağ-ı mezbûrun altından kıymet-i şer‘iyyesinin mezbûr Abdullah Beşe’den alıverilmesi matlûbumdur dedikde gıbbe’s-suâl mezbûr Abdullah Beşe vech-i muharrer üzre zağferan semeninden zimmetinde müteveffâ-yı mezbûrun mezkûrü’n-na‘t akçe üzre on dokuz bin altı yüz akçe hakkı olduğunu ikrâr lâkin müdde‘î-i mezbûr ile mezbûre Fâtıma’nın vech-i muharrer üzre verâsetlerini inkâr edicek müdde‘î-i mezbûrdan vech-i meşrûh üzre verâsetlerine ve mezbûre Fâtıma tarafından vekâletine beyyine taleb olundukda karye-i mezbûre ahâlîsinden olup udûl-i ricâl-i müslimînden olan Hasan Beşe b. Musli ve Mahmud Beşe b. Osman nâm kimesneler li ecli’ş-şehâde meclis-i şer‘-i şerîfde hâzırân olup istişhâd olunduklarında fi’l-hakīka müdde‘î-i mezbûr müteveffâ-yı mezbûrun li ebeveyn karındaşı ve merkūme Fâtıma li üm kız karındaşı olup müdde‘î-i mezbûr ile müteveffâ-yı mezbûrun babalarının adları Ali ve merkūme Fâtıma’nın babasının adı Ramazan ve analarının adı Sâliha ve maskat-ı re’sleri karye-i mezbûre olup müteveffâ-yı mezbûrun verâseti müdde‘î-i mezbûr ile mezbûr Fâtıma’ya münhasıradır, müteveffâ-yı mezbûrun bunlardan gayrı vârisi ve terekesine âhar müstahıkkı olduğu ma‘lûmumuz değildir mezbûre Fâtıma müteveffâ-yı mezbûrun vech-i muharrer üzre zağferan semeninden mezbûr Abdullah Beşe zimmetinde hakkı olan meblağ-ı mezkûrü’n-na‘tdan hissesini taleb-i da‘vâ ve ahz u kabz ve kendiye îsâle ve ahz ve îsâl mütevakkıf olduğu umûrun cümlesine müdde‘î-i mezbûr Mehmed’i bizim huzûrumuzda vekîl ve menâbına nâib nasb ve ta‘yîn edip ol dahi vekâlet-i mezbûreyi kabûl ve merâsimini edâya şehâdet-i şer‘iyye eylediğinde gıbbe ri‘âyeti şerâiti’l-kabûl şehâdetleri makbûle olup müdde‘î-i mezbûr ile mezbûre Fâtıma’nın vech-i muharrer üzre verâsetlerine ve mezbûre Fâtıma tarafından müdde‘î-i mezbûrun vekâletine ba‘de’l-hükm meblağ-ı mezkûrun [107a] (…) şer‘iyyesi olan altmış yedi tâm ve beş çekirdek yaldız altınını müdde‘î-i mezbûra teslîme mezbûr Abdullah Beşe’ye tenbîh birle mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Ali Beşe b. Ferhad, Abdüllatîf b. Ali, Mehmed b. Receb, Mahmud b. Abdullah, Kalaycı Veli Beşe b. ( ).