Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 353 Hüküm no: 307 Orijinal metin no: [86b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı Zülfikar b. Abdullah’ın vasiyet yoluyla azat edilmiş olduğu İşbu orta boylu siyah kaşlı sarı yüzlü Rûsiyyetü’l-asl râfi‘ü’l-kitâb Zülfikār b. Abdullah nâm kimesne bundan akdem mahmiye-i Galata’ya tâbi‘ kasaba-i Kasımpaşa mahallâtından Küçük Piyâle Paşa mahallesinde sâkin iken vefât eden Yahya b. Ramazan nâm müteveffânın zevce-i metrûkeleri Emine bt. İvaz ve Havva bt. ( ) nâm hâtunların ve li ebeveyn karındaşı Mehmed Çelebi’yi meclis-i şer‘a ihzâr ve mahzarlarında üzerlerine takrîr-i da‘vâ ve ta‘bîr ani’l-merâm edip abd-i memlûkü olduğumuz müteveffâ Yahya Çelebi bizi tedbîr-i mutlak ile tedbîr edip hâlâ civâr-ı rahmet-i Hayy-i Kayyûm’a irtihâl ve intikāl etmekle âzâd olmuşundur suâl olunup mûcebiyle amel olanması matlûbumdur dedikde gıbbe’s-suâl ve akībe’l-inkâr müdde‘î-i mezbûrdan da‘vâsını mübeyyin beyyine taleb olundukda udûl-i ricâlden Mehmed Ali Kapudân b. Ahmed ve Mehmed Ali b. Ramazan nâm kimesneler li ecli’ş-şehâde meclis-i şer‘a [87a] hâzırân olup gıbbe’l-istişhâd fi’l-vâki‘ müteveffâ Yahya Çelebi hâl-i hayâtında ve kemâl-i akl-i sıhhatinde bizim huzûrumuzda müdde‘î-i merkūm Zülfikār’ı tedbîr-i mutlak ile tedbîr eyleyip hâlâ civâr-ı rahmet-i Hayy-i Kayyûm’a irtihâl ve intikāl eylemeğin müdde‘î-i merkūm âzâd olmuşdur, biz bu husûsa bu vech-i üzere şâhidleriz ve şehâdet dahi ederiz deyû her birleri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra müdde‘î-i merkūm Zülfikār’ın tedbîrine hüküm birle mâ vaka‘a gıbbe’t-taleb ketb olundu, cerâ zâlike ve hurrire fi’l-yevmi’l-hâmis ve’l-ışrîn min Zilka‘deti’ş-şerîfe li sene selâse ve hamsîn ve elf. Şuhûdü’l-hâl: Fahrü’l-eimme Mehmed Efendi b. Yusuf, fahrü’l-akrân Ahmed Çelebi b. ( ), Şaban Beşe b. Mustafa, Hamza Ağa b. Mustafa.