Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 353 Hüküm no: 308 Orijinal metin no: [87a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı Gülistan bt. Abdullah’ın azat edildiği Mahmiye-i Galata’ya tâbi‘ kasaba-i Kasımpaşa mahallâtından Küçük Piyâle Paşa mahallesi sâkinlerinden iken bundan akdem vefât eden Yahya Çelebi b. Ramazan nâm müteveffânın menziline varılıp akd-i meclis-i mutahhar olundukda zevce-i metrûkesi Emine bt. İvaz nâm hâtun meclis-i şer‘-i hatîr-i lâzimü’t-tevkīrde işbu orta boylu açık kaşlı sarı yüzlü câriye-i memlûkem olan Rûsiyyetü’l-asl râfi‘atü’l-kitâb Gülistan bt. Abdullah nâm câriye mahzarında bi’t-tav‘i’s-sâf ikrâr ve sahîh-i şer‘î ve i‘tirâf-ı sarîh-i mer‘î edip evsâf-ı mevsûfe ile mevsûfe olan mezbûre Gülistan’ı hasbeten lillâhi te‘âlâ ve taleben li merzâti Rabbihi’l-a‘lâ "men a‘taka rakabeten mü’mineten a‘takallâhu te‘âlâ bi külli uzvin minhâ uzven minhu mine’n-nâr" fehvâ-yı hadîs-i şerîfiyle âmil olup i‘tâk ve tahrîr edip silk-i mülkümden âzâd ve sâir harâir-i asliyyâta idrâc eyledim ba‘de’l-yevm mezbûre Gülistan sâir harâir-i asliyyât gibi hürre olsun uhdesinde utekā üzerinde mevâlî için sâbite olan hakk-ı velâdan gayrı hakkım ve alâkam kalmadı dedikde mukırra-i mezbûrenin ikrârını el-mukarru leha’l-merkūme Gülistan bi’l-muvâcehe tasdîk ve bi’l-müşâfehe tahkīk edicek mâ vaka‘a gıbbe’t-taleb ketb olunup işbu hurûf li ecli’l-vesîka yed-i râgıba vaz‘ ve def‘ olundu, cerâ zâlik. Ve hurrire fî gurreti Zilhicceti’ş-şerîfe li sene selâse ve hamsîn ve elf. Şuhûdü’l-hâl: Hamza Ağa b. Mustafa, İbrahim b. Şaban, Ramazan b. Abdi, Şaban b. Mustafa er-Râcil, fahrü’l-eimme Mehmed Efendi b. Yusuf, Ahmed Çelebi b. ( ).