Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 354 Hüküm no: 309 Orijinal metin no: [87a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan Hâtun’un ölen kocası İsmail Çelebi b. Hüseyin terekesinden hakkını aldığı Mahmiye-i Galata’ya tâbi‘ kasaba-i Kasımpaşa mahallâtından Sirkeci mahallesinde sâkin iken bundan akdem vefât eden İsmail Çelebi b. Hüseyin nâm müteveffânın verâseti zevce-i metrûkesi İsmihan Hâtun’a ve anası Sâime Hâtun bt. Hasan’a ve li ebeveyn kız karındaşı Kâtibe’ye münhasıra olduğu şer‘an mütehakkik ve mütebeyyin oldukdan sonra mezbûre İsmihan Hâtun tarafından zevci müteveffâ-yı mezbûr İsmail Çelebi’den alâ tarîki’l-irsi’ş-şer‘î kendiye isâbet eden dört sehimden bir sehim hisseyi ahz ve kabza ve kendiye îsâle sâbitü’l-vekâle vekîli olan babası Mahmud Çelebi b. Halil nâm kimesne mahfil-i kazâda müteveffâ-yı merkūmun muhallefâtına vâzı‘atü’l-yed olan işbu râfi‘atü’l-kitâb mezbûre Sâime Hâtun mahzarında bi’l-vekâle bi’t-tav‘i’s-sâf takrîr ve i‘tirâf edip müteveffâ-yı merkūmun muhallefâtından müvekkilem merkūmeye isâbet eden dört sehimden bir sehim menzilinden ve odalarından esâs-ı beyt evânîden intikāl eden hisse-i şer‘iyyesin bi’t-tamâm ve’l-kemâl ahz ve kabz eyledim ba‘de’l-yevm husûs-ı mezbûra müte‘allik benden veya müvekkilem mezbûre İsmihan’dan da‘vâ ve nizâ‘ sâdır olursa lede’l-hükkâmi’l-kirâm makbûle ve mesmû‘a olmasın dedikde [87b] mukırr-ı mezbûr Mahmud Çelebi’nin ikrâr-ı meşrûhasın el-mukarru leha’l-merkūme Sâime Hâtun bi’l-muvâcehe tasdîk ve bi’l-müşâfehe tahkīk edicek mâ vaka‘a gıbbe’t-taleb ketb olundu, cerâ zâlike ve hurrire fi’l-yevm min Zilhicceti’ş-şerîfe li sene selâse ve hamsîn ve elf. Şuhûdü’l-hâl: Hüseyin Ağa b. Hasan, es-Seyyid Ahmed Ağa b. es-Seyyid Mehmed, Abdurrahman Efendi b. Abdülmennân, Mehmed Çelebi b. Ramazan, Mehmed Çelebi b. Ramazan.