Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 355 Hüküm no: 310 Orijinal metin no: [87b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ömer’in ölmeden önce kocası Mehmed Çelebi’den mehrinin yarısını aldığı kalan yarısının ise ölümünden sonra hayır işlerine sarf edilmesini vasiyet ettiği Mahmiye-i Galata’ya tâbi‘ kasaba-i Tophâne mahallâtından Firuz Ağa mahallesinde sâkine iken bundan akdem vefât eden Fâtıma bt. Ömer nâm müteveffânın verâseti zevc-i metrûkü Mehmed Çelebi b. Himmet’e ve li ebeveyn karındaşları Mustafa’ya ve Ahmed’e ve li ebeveyn kız karındaşı İsmihan nâm hâtuna münhasıra olduğu şer‘an mütehakkik ve mütebeyyin oldukdan sonra mezbûre İsmihan tarafından mûrisesi müteveffât-ı merkūme Fâtıma Hâtun’dan alâ tarîki’l-irsi’ş-şer‘î kendiye isâbet eden hisse-i şer‘iyyeyi da‘vâ ve talebe ve yine îsâle vekîl olup vekâleti sâbite olan zevci Hasan Çelebi b. Mustafa nâm kimesne ile li ebeveyn karındaşı mersûm Mustafa Çelebi b. Ömer meclis-i şer‘-i hatîr-i lâzimü’t-tevkīrde müteveffât-ı merkūmenin zevci işbu râfi‘ü’l-kitâb merkūm Mehmed Çelebi mahzarında da‘vâ ve takrîr-i kelâm edip mûrisemiz müteveffât-ı merkūmenin yirmi bin akçe mehr-i müecceli olup hâlâ zimmetinde mütekarrirdir suâl olunup sâir muhallefâtına idhâl edip her birimize andan dahi isâbet eden hisse-i şer‘iyyeyi ahz ve kabz ettirilmesi matlûbumuzdur dediklerinde gıbbe’s-suâl mezbûr Mehmed Çelebi cevâbında fi’l-hakīka müteveffât-ı merkūme hâtunun mehr-i müeccelinden benim zimmetimde yirmi bin akçe hakkım var idi lâkin hâl-i hayâtında on bin akçesin edâ ve teslîm eyleyip bâkī kalan on bini dahi maraz-ı mevtinde techîz [ve] tekfînine ve vücûh-ı hayrâta harc ve sarf olunmak için vasiyyet ve beni dahi tenfîz-i vasiyyete vasiyy-i muhtâr eyledi dedikde mezbûr Mehmed Çelebi’nin sıdk-ı makālini mübeyyin beyyine taleb olundukda udûl-i müslimînden olup mahalle-i mezbûre sükkânından fahrü’l-eimme Mustafa Efendi b. Mehmed el-İmâm ve Mustafa Beşe b. Ömer nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ müteveffât-ı mezbûre Fâtıma Hâtun hâl-i hayâtında ve kemâl-i akl-i sıhhatinde zevcim Mehmed Çelebi zimmetinde mütekarrir yirmi bin mehr-i müeccelimden on bin akçesin bi’t-tamâm ve’l-kemâl ahz ve kabz eyledim deyû ikrâr eyledi ve bâkī kalan meblağ-ı mezbûru maraz-ı mevtinde techîz [ve] tekfînine ve vücûh-ı hayrâta harc ve sarf olunsun deyû vasiyyet ve zevci Mehmed Çelebi’yi tenfîzine vasiyy-i muhtâr eyledi biz bu husûsa minvâl-i muharrer üzere şâhidleriz ve şehâdet dahi ederiz deyû her birleri edâ-i şehâdet-i şer‘iyye eylediklerinde şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a oldukdan sonra vekîl-i merkūm Hasan Çelebi b. mersûm Mustafa Çelebi mu‘ârazadan men‘ olunup müşârün-ileyh Mehmed Çelebi’ye zimmetinde bâkī kalan meblağ-ı mezkûru techîz [ve] tekfînine ve vücûh-ı hayrâta harc ve sarf etmeye tenbîh birle mâ vaka‘a gıbbe’t-taleb ketb olundu, cerâ zâlik. Ve hurrire fi’l-yevmi’s-sânî min Zilhicceti’ş-şerîfe li sene 1053. Şuhûdü’l-hâl: Fahrü’l-kuzât Ramazan Efendi b. Mustafa, umdetü’l-kuzât Receb Efendi b. ( ), Mustafa Beşe b. Hüseyin, Ve Bayram Beşe b. Yakub.