Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 694 Hüküm no: 895 Orijinal metin no: [107a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Agop v. Garal’ın, arsasını Ohro v. Serkis’e sattığı Fi’l-asl vilâyet-i Anadolu’da Eğin kasabasında Yukarı mahalle sükkânından olup mahmiye-i İstanbul’da kayıkçı tâifesinden Agop v. Garal nâm zimmî meclis-i şer‘-i şerîf-i lâzımü’t-teşrîfde işbu bâ‘isü’l-kitâb Ohro v. Serkis nâm zimmî muvâcehesinde ikrâr ve takrîr-i kelâm edip akd-i âtî sudûruna değin yedimde mülküm ve hakkım olup kasaba-i mezbûr sınırı dâhilinde vâki‘ bir tarafdan diğer Agop nâm zimmî bağı ve iki tarafdan Serkis nâm zimmî bağı ve bir tarafdan ba‘zen kız karındaşım Devlet bağı ve bir tarafdan tarîk-i âm ile mahdûd mülk bağımı bi cümleti’t-tevâbi‘ ve’l-levâhık ve kâffeti’l-hukūk ve’l-merâfık mezbûr Ohro’ya otuz altı kıt‘a esedî guruşa ve yine kasaba-i mezbûrda Bayır nâm mevzi‘de vâki‘ beyne’l-ahâlî ve’l-cîrân ma‘lûmü’l-hudûd mülk arsa-i hâliyemi beş esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve kabûl ettikden sonra semenleri olan meblağ-ı mezbûr kırk bir kıt‘a esedî guruşu mezbûr Ohro yedinden ahz u kabz edip meblağ-ı mezbûru mahallinde zabt ve tasarrufa müşterî-i mezbûr Ohro’yu taslît eyledim ba‘de’l-yevm zikr olunan bağ ve arsa-i hâliye mezbûr Ohro’nun mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Bektaş Beşe b. Mehmed, Mustafa Beşe b. Mehmed, Hasan Çelebi b. Ahmed, İbrahim Çelebi b. Ahmed.