Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 52 Hüküm no: 5 Orijinal metin no: [1b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Babası ölen Ahmed’in masrafları için annesi Âişe bt. Receb’e ödeme yapılması Mahmiye-i Galata dâhilinde Emekyemez mahallesinde sâkin iken bundan akdem vefât eden Ruşen nâm kimesnenin sulbî sagīr oğlu Ahmed’in vasîsi olan Şahkulu Hâtun bt. Mustafa mahfil-i kazâda işbu râfi‘atü’l-vesîka Âişe bt. Receb nâm Hâtun mahzarında bi tav‘ihâ ikrâr ve takrîr-i kelâm edip vasîsi olduğum mezbûr Ahmed oğlum müteveffâ-yı mezbûr Ruşen’in oğlu olup lâkin hakk-ı hidâne mezbûre Âişe Hâtun’un olmağla sagīr-i mezbûr mezbûre Âişe’nin hucr ve terbiyesinde olmağın nafaka-i mefrûza ve kisve bahâsından mâ‘adâ sagīr-i mezbûrun mülk-i mevrûsu olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd menzili âhara yevmî altışar akçeye îcâr edip beher mâh hâsıl olan ücretinden yetmiş akçesin sagīr-i mezbûrun me’ûnet-i süknâsına ve mezbûre Âişe Hâtun’a edâ etmek üzre kavl ve ta‘ahhüd eyledik dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis aşer min Recebi’l-mürecceb li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Siyavuş b. Abdullah ve gayruhüm