Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 694 Hüküm no: 896 Orijinal metin no: [107a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Cabril v. Mihayil’in kızı Maryem’in terekeden kendisine kalan meblağı diğer vârislerden aldığı Fi’l-asl vilâyet-i Anadolu’da medîne-i Haleb-i şehbâ mahallâtından Bâbü’n-nasr mahallesinden olup mahmiye-i İstanbul hısnı ebvâbından Kumkapı dâhilinde Nişancı Paşa-yı Atîk mahallesinde sâkin iken bundan akdem hâlik olan Cabril v. Mihayil nâm zimmînin verâseti vâlidesi Kedrile bt. Şehdi ile li ebeveyn kebîr karındaşı Abdullah ile li ebeveyn kız karındaşı Maryem’e münhasıra olduğu şer‘an mütehakkik oldukdan sonra mezbûre Maryem meclis-i şer‘-i şerîf-i lâzımü’t-teşrîfde tereke-i hâlik-i mezbûra vâzı‘ateyi’l-yed olan işbu bâ‘iseyi’s-sifr vâlidesi mezbûre Kedrile ile karındaşı mezbûr Abdullah muvâcehesinde ikrâr ve takrîr-i kelâm edip karındaşım hâlik-i mezbûr Cabril’in mülk terekesinden bana isâbet eden hisse-i şer‘iyyemi mezbûrândan taleb ve da‘vâ eylediğimde beynimizde münâza‘ât-ı kesîre vukū‘undan sonra muslihûn tavassut edip muhallefât-ı mezbûrdan bi tar[îk]i’t-tehârüci’ş-şer‘î nakid râyic fi’l-vakt on sekiz esedî guruş üzerine benimle inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr on [sekiz guruşu] yedlerinden tamâmen ahz u kabz edip tereke-i hâlik-i mezbûra müte‘allika da‘vâdan mezbûrân Kedrile ve Abdullah’ın zimmetlerini ibrâ-i âmm-ı kātı‘ü’n-nizâ‘la ibrâ eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Es-Seyyid Mehmed Çelebi b. es-Seyyid Ali, es-Seyyid Ömer b. es-Seyyid Ebûbekir, İbrahim Çelebi b. Abdullah, Hasan b. Ahmed.