Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 58 Hüküm no: 16 Orijinal metin no: [2b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yağkapanı bakkallarından Yani v. Yorgo’nun varislerinin miras davasında beytülmâl görevlisiyle sulh sağlandığı Vilâyet-i Rumeli’nde Mizistre kazâsına tâbi‘ Seçre nâm karye sâkinlerinden olup bundan akdem mahrûsa-i Galata’da Yağkapanı kurbunda bakkal iken hâlik olan Kurubalık demekile ma‘rûf Yani v. Yorgo’nun verâseti li ebeveyn kız karındaşı Veledon nâm nasrâniye ile li ebeveyn ammisi oğlu Mihal v. Mavridi nâm zimmîye münhasıra olduğu şer‘an zâhir olmağla merkūmân Veledon ve Mihal taraflarından husûs-ı âti’l-beyânı da‘vâ ve talebe ve inde’l-hükkâm mürâfa‘a ve reddi cevâba ve lâzım gelir ise sulhe ve bedel-i sulhü ahz ü kabza ve kendilere îsâle Papa Yani ve Alfosta nâm zimmîler vekîl oldukları yedlerinde nakl-i şer‘î ile sâbit ve zâhir olduklarından sonra vekîlân-ı merkūmân Papa Yani ve Alfosta mahfil-i kazâda mahrûsa-i merkūmede bi’l-fi‘l voyvoda ve beytülmâl emîni olan umdetü’l-emâcid ve’l-a‘yân Siyavuş Ağa’nın kethüdâsı işbu râfi‘ü’l-kitâb İsmail Ağa mahzarında her biri bi’l-vekâle ikrâr ve takrîr-i kelâm edip merkūm Yani hîn-i helâkinde vârisleri bu tarafda mevcûd olmamağla muhallefâtından müvekkil-i mûmâ-ileyh Siyavuş Ağa işbu hâzır bi’l-meclis müsellim Nikola v. Nikite nâm zimmî yediyle yetmiş bin akçesini ber mûceb-i defter-i kassâm bi’l-emâne ahz ü kabz etmekle biz dahi meblağ-ı merkūmu vekâletimiz hasebiyle emîn-i müşârün-ileyhden da‘vâ ve taleb eylediğimizde beynimizde münâza‘ât-ı kesîre vâkı‘a olmuşidi el-hâletü hâzihî vesâtat-ı muslihîn ile meblağ-ı merkūmdan otuz beş bin akçe üzerine bizi sulh eylediklerinde biz dahi bi’l-vekâle sulh-i merkūmu kabûl ve bedel-i sulh olan meblağ-ı mezbûrdan otuz bin akçesini vekîl-i mezbûr İsmail Ağa yedinden ve beş bin akçesini hâzır bi’l-meclis müsellim Nikola yedinden ki cem‘an otuz beş bin akçeyi bi’t-tamâm ve’l-kemâl ahz ü kabz edip meblağ-ı bâkī otuz beş bin akçe da‘vâsından müvekkil-i mûmâ-ileyh Siyavuş Ağa’nın ve merkūm müsellim Nikola’nın zimmetlerini ibrâ-i âm ve kātı‘ü’n-nizâ‘la ibrâ ve iskāt eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Recebi’l-ferd li sene selâse ve seb‘în ve elf Şuhûdü’l-hâl: Mehmed Bey b. Ali el-Cündî, Osman Bey b. Abdullah, Mahmud b. Mehmed, Mustafa b. Osman, el-Hâc Mehmed b. Ali, Hüseyin b. Receb, Mansur Çelebi b. Mustafa Ağa, İbrahim b. Abdülbâkī, İsmail Bey b. Mehmed ve gayruhüm.