Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 59 Hüküm no: 17 Orijinal metin no: [2b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Abdullah ve eşinin kirası vakfa ait evlerini Siyami Beşe b. İbrahim’e devretmeleri Mahmiye-i Galata müzâfâtından kasaba-i Beşiktaş’a tâbi‘ Kara Yani bahçesi dimekle ma‘rûf Hadîka-i sultânî kurbunda vâki‘ Çakır Baba mahallesi sükkânından olup kendi tarafından asîl ve zevcesi Fâtıma bt. İbrahim nâm hâtun tarafından husûs-ı âti’l-beyânı ikrâra vekîl olup mezbûreyi ma‘rifet-i şer‘iyye ile ârifân Mustafa b. Durmuş ve Seydi Ali b. Mustafa şehâdetleri ile şer‘an vekâleti sâbite olan Ali Beşe b. Abdullah meclis-i şer‘-i hatîr lâzımü’t-tevkīrde işbu râfi‘ü’l-kitâb Siyâmi Beşe b. İbrahim mahzarında bi’l-asâle ve bi’l-vekâle ikrâr-ı tâm ve takrîr-i kelâm edip ashâb-ı hayrâtdan Süleyman b. Abdullah ile Nurpaşa nâm hâtunun tevliyyet ve gallesini mescid-i mezbûrda imâm olanlara şart ve ta‘yîn eylediği evkāflarından olup mahalle-i merkūmede vâki‘ iki tarafdan mahalle-i mezbûre imâmına meşrût olan vakıf menzil ve bir tarafdan umdetü’l-mevâli’l-izâm İshak Efendi hazretlerinin tasarrufunda olan vakıf menzil ve bir tarafdan tarîk-i âm ile mahdûd ve iki bâb tahtânî odaları ve kenîfi ve zât-ı eşcâr-ı müsmire ve gayr-ı müsmire cüneyne ve müşârün-ileyh İshak Efendi ile müşterek sokak kapısını müştemil icâre-i mu‘accele ve ayda yirmişer akçe ücret-i müeccele ile ale’l-iştirâki’s-seviy müvekkile-i mezbûre Fâtıma ile tasarrufumuzda olan menzilimin hakk-ı tasarrufunu ma‘rifet-i mütevellî ile vakf-ı mezbûr ile iki yüz on kıt‘a esedî guruş bedel mukābelesinde merkūm Siyâmi Beşe’ye ferâğ ve tefvîz edip ol dahi vech-i muharrer üzre tefevvuz ve kabûl eyledikden sonra bedeli olan meblağ-ı mezbûr iki yüz on esedî guruşu yedinden bi’t-tamâm ve’l-kemâl ahz ü kabz eyledik ba‘de’l-yevm menzil-i mahdûd-ı mezkûr merkūm Siyâmi Beşe’nin hakk-ı müfevvazıdır keyfe mâ yeşâ’ ve yehtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Recebi’l-ferd li sene selâse ve seb‘în ve elf. Şuhûdü’l-hâl: Ali Efendi b. Mehmed, Ahmed Yazıcı b. Mehmed, Hüseyin b. Abdullah, Mustafa b. Receb, el-Hâc Cafer b. Yakub, Muharrem b. Receb ve gayruhüm