Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 60 Hüküm no: 18 Orijinal metin no: [3a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Osman’ın eşi Fâtıma bt. Maden’den muhâlaa yoluyla boşandığı Fi’l-asl vilâyet-i Anadolu’da vâki‘ Göçi kazâsına tâbi‘ Hasan Işık nâm karyeden olup hâlâ mahmiye-i Galata’da Câmi‘-i Kebîr mahallesinde sâkin Ahmed b. Osman nâm kimesne meclis-i şer‘-i hatîr lâzımü’t-tevkīrde yine vilâyet-i mezkûrede vâki‘ Beyşehri kazâsına tâbi‘ Tokna nâm karyede sâkine işbu râfi‘atü’l-vesîka Fâtıma bt. Maden nâm hâtun tarafından husûs-ı âti’l-beyânı tasdîka vekîl olup bimâ hüve nehcü’s-sübût şer‘an vekâleti sâbite olan Musli b. el-Hâc Abdünnebi nâm kimesne mahzarında ikrâr ve takrîr-i kelâm edip müvekkile-i mezbûre Fâtıma Hâtun bundan akdem zevce-i menkûham olmağla târih-i kitâbdan bir sene mukaddem zimmetimde mütekarrir ve ma‘kūdun aleyh olan iki yüz akçe mehr-i müeccelinden ve nafaka-i iddet ve me’ûnet-i süknâsından fâriğa olmak üzre benim ile muhâla‘a-i sahîha-i şer‘iyye ile hul‘ oldukda ben dahi minvâl-i muharrer üzre olan hul‘u kabûl eylediğimden sonra zevciyyete müte‘allika da‘vâdan her birimiz âharın zimmetini ibrâ-i âm ile ibrâ ve iskāt eylemişidik, hâlâ müvekkile-i mezbûre Fâtıma Hâtun târih-i mezkûrdan beri vech-i meşrûh üzre benden mutallakadır benim kat‘â alâka ve medhalim yokdur dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min şehri Recebi’l-ferd li sene selâse ve seb‘în ve elf Şuhûdü’l-hâl: Mehmed Beşe b. Mustafa Dede, Ali b. Bahçeli, Muharrem b. Receb, Ali Beşe b. Hüseyin, Musa b. Ali