Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 60 Hüküm no: 19 Orijinal metin no: [3a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâime bt. el-Hâc Mustafa’nın muhâlaa yoluyla eşi Musa Beşe’den boşanması Mahrûsa-i Galata’ya tâbi‘ kasaba-i Tophâne’de Tomtom mahallesinde sâkine Sâime bt. el-Hâc Mustafa nâm hâtun meclis-i şer‘-i hatîr-i lâzımü’t-tevkīrde Akdeniz’de vâki‘ Molova nâm kasaba sükkânından olup mezbûrenin zevci Musa Beşe b. Hasan nâm kimesne tarafından hul‘-ı âti’l-beyânı ikrâra vekîl olup Hüseyin Beşe b. Hasan ve İbrahim Reis b. Mustafa nâm kimesneler şehâdetleri ile şer‘an vekâleti sâbite olan işbu râfi‘ü’l-kitâb Hüseyin Beşe b. Musa nâm kimesne mahzarında bi tav‘ihâ ikrâr ve takrîr-i kelâm edip zevcim merkūm zimmetinde mütekarrir ve ma‘kūdun aleyh olan bin akçe mehr-i müeccelimden ve nafaka-i iddet-i mu‘ayyene-i ma‘lûme ve me’ûnet-i süknâmdan fâriğa olmak üzre muhâla‘a-i sahîha-i şer‘iyye ile muhâla‘a edip vekîl-i merkūm Hüseyin Beşe dahi müvekkili için hul‘-ı mezbûru kabûl eyledikden sonra zevciyyete ve gayra müte‘allika âmme-i de‘âvîden mezbûr Musa Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Recebi’l-ferd li sene selâse ve seb‘în ve elf Şuhûdü’l-hâl: Ahmed Efendi b. Ali, Abdülbâkī Ağa Ser-muhzırân, el-Hâc Mustafa b. Halil, Mustafa b. Receb, Süleyman Efendi b. (…), Ahmed b. Mehmed ve gayruhüm