Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 61 Hüküm no: 20 Orijinal metin no: [3a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sürûri Efendi mahallesinden Safiye bt. Ahmed’in kötü bir kadın olduğunun mahalle halkı tarafından tasdik edildiği Dergâh-ı âlî -dâme mahfûfen bi’l-me‘âlî- çavuşlarından Hüseyin Çavuş b. Ahmed yediyle buyruldu-yı şerîf vârid olup mazmûn-ı şerîfinde kasaba-i Kasımpaşa’da Sürûrî Efendi mahallesinde sâkine Safiye bt. Ahmed nâm hâtunun keyfiyyet-i hâli ahâlî-i mahalle-i mezbûreden tefahhus ve istihbâr olunup vukū‘u üzre Dîvân-ı hümâyûna i‘lâm oluna deyû buyurulmağın imtisâlen li’l-emr ahâlî-i mahalle-i mezbûre ahâlîsinden İbrahim Efendi b. Mustafa el-İmâm ve Ali b. Mustafa ve Ahmed Beşe b. Himmet ve Mustafa b. Ahmed ve Osman Beşe b. Mehmed ve Mustafa Çelebi b. Mehmed ve Mehmed Çelebi b. Ali ve Müstakīm Beşe b. Abdullah nâm kimesneler ile mezbûre Safiye Hâtun meclis-i şer‘a ihzâr olunup mezbûre Safiye Hâtun’un keyfiyyet-i hâli istihbâr olundukda her biri mezbûre Safiye Hâtun muvâcehesinde fi’l-vâki‘ mezbûre Safiye Hâtun kendi hâlinde olmayıp ve kendiye ecnebî olanlardan tehâşîsi olmayıp şenâ‘atle müte‘ârifedir ve’l-hâsıl iyi kimesne değildir deyû her biri mezbûrenin sû-i hâlini alâ tarîki’ş-şehâde haber verdiklerinde ber mûceb-i fermân-ı âlî vâki‘ hâl ketb ve terkīm olundu. Fi’l-yevmi’s-sâlis ve’l-ışrîn min şehri Recebi’l-ferd li sene selâse ve seb‘în ve elf Şuhûdü’l-hâl: Ali Çavuş b. Rıdvan, Ahmed Yazıcı b. Mehmed, Mustafa b. Receb, Mehmed b. Receb, Âbid b. Mustafa, Emrullah b. Mehmed, Musa b. Receb