Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 695 Hüküm no: 897 Orijinal metin no: [107a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Receb ile karısı Sâliha Hatun’un vakfettiği evin vakfiye gereği âzatlılarına intikal ettiği ve bunların müşterek oturmalarına karar verildiği Mahmiye-i İstanbul’da Müftü hamamı kurbunda sâkine olup vech-i âtî üzre da‘vâya me’zûneler olan bâ‘iseteyi’l-kitâb Sâliha ve Râbia bintey Yusuf nâm hâtunlar meclis-i şer‘-i şerîf-i Ahmedî ve mahfil-i dîn-i münîf-i Muhammedî’de vâkıf-ı âti’z-zikrin mu‘takı Keyvan’ın sulbiye kızı olup müstakillen meşrûtası olmak üzre menzil-i âti’l-beyâna vâzı‘atü’l-yed olan Kahraman nâm hâtun mahzarında üzerine da‘vâ ve takrîr-i kelâm edip mahmiye-i mezbûrda Gül Câmi‘i mahallesinde vâki‘ bir tarafdan Boyacı Hasan vakfı ve iki tarafdan tarîk-i âm ve bir tarafdan Davud Beşe menzili ile mahdûd olup fevkānî ve tahtânî büyût-ı adîdeyi müştemil olan menzili ale’l-iştirâki’s-seviy mâlikleri olan el-Hâc Receb b. Şaban nâm kimesne ile zevcesi Sâliha Hâtun bt. Ramazan Çavuş yedimizde olan vakfiyye-i ma‘mûlün-bihâları nâtıka olduğu üzre bin kırk yedi senesinde vakf-ı lâzım ile vakf edip süknâsı evvelâ kendi nefislerine ba‘de vefâtihimâ batnen ba‘de batnin ile’l-inkırâz evlâdlarına ve evlâd-ı evlâd-ı evlâdlarına ve evlâd-ı evlâdlarına ve ba‘de’l-inkırâz utekālarına ve ba‘dehû batnen ba‘de batnin ile’l-inkırâz utekālarının evlâdlarına evlâd-ı evlâdlarına ve ba‘de’l-inkırâz gallesini Medîne fukarâsına şart ve ta‘yîn edip vâkıfân-ı mezbûrân fevt olup evlâdları münkariz ve utekālarından kimesne olmayıp biz dahi vâkıfe-i mezbûre Sâliha’nın âzâdlısı Yusuf’un sulbiye kızları olup mezbûre Kahraman ile derecede müsâvî olup menzil-i mezbûrun süknâsında mezbûre Kahraman’a müşârikeler iken mezbûre Kahraman menzil-i mezbûrda müstakillen sâkine olup bizi süknâdan men‘ eder suâl olunup ihkāk-ı hak olunmak matlûbumdur dediklerinde gıbbe’s-suâl mezbûre Kahraman menzil-i mezbûr vâkıfân-ı mezbûrânın vech-i meşrûh üzre vakfı olup kendi dahi vâkıf-ı mezbûr el-Hâc Receb’in âzâdlısı Keyvan’ın kızı olup meşrûtası olmak üzre vaz‘-ı yed ettiğini ikrâr lâkin müdde‘iyyetân-ı mezbûretân vâkıfe-i mezbûre Sâliha’nın âzâdlısı Yusuf’un kızları olduklarını inkâr etmeğin müdde‘iyyetân-ı mezbûretândan müdde‘âlarını mübeyyine beyyine taleb olunduklarında ityân-ı beyyineden izhâr-ı acz edip istihlâf ettiklerinde mezbûre Kahraman’a müdde‘iyyetân-ı mezbûretân vâkıfe-i mezbûre Sâliha’nın âzâdlısı Yusuf’un kızları olmayıp menzil-i mezbûrun süknâsında kendiye müşârikeler olmadıklarına yemîn teklîf olundukda mezbûre Kahraman yemînden nükûl etmeğin mûcebince müdde‘iyân-ı mezbûretâna menzil-i mezbûrun süknâsında mezbûre Kahraman’a müşârikeleri olmak üzre hükm olunmağın mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mustafa Çavuş [b.] İbrahim el-Mübâşir, umdetü’l-akrân Abdülcelil b. el-merhûm Hüseyin, Hacı İbrahim b. İslâm.