Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 62 Hüküm no: 22 Orijinal metin no: [3a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yağkapanı bakkallarından Yani v. Yorgo’nun varislerinin miraslarını teslim aldıkları Vilâyet-i Rumeli’nde Mizistre kazâsına tâbi‘ Seçre nâm karye sâkinlerinden olup bundan akdem mahrûsa-i Galata’da Yağkapanı kurbunda bakkal tâifesinden iken hâlik olan Kuru Balık demeğiyle ma‘rûf Yani v. Yorgo’nun verâseti li ebeveyn kız karındaşı Veloda nâm nasrâniye ile li ebeveyn ammisi oğlu Mihal v. Mavridi nâm zimmîye münhasır olduğu şer‘an zâhir olmağla mezbûrân Veloda ve Mihayil taraflarından husûs-ı âti’l-beyânı da‘vâ ve talebe ve lede’l-hükkâm mürâfa‘a ve redd-i cevâba ve sulh ve ibrâya ve bedel-i sulhü ahz ü kabza ve kendilere îsâle vekîller olup kazâ-i mezbûrede hilâfete müvellâ olan Mehmed Efendi b. Ahmed tarafından nakl-i şer‘î ile vekâletleri a‘lemü’l-ulemâ’i’l-izâm, efdalü’l-fuzelâi’l-fihâm, hallâlü müşkilâti’d-dîniyye, keşşâfü mu‘dilâti’l-yakīniyye bi’l-fi‘l Rumeli Kazaskeri taraf-ı bâhirü’ş-şereflerinden umûr-ı şer‘iyye istimâ’ına memûr olan Yakub Efendi huzûrunda sâbit ve zâhir olup yedlerine hüccet-i şer‘iyye verilen Papa v. Yanaki ve Anağnaşte nâm zimmîler mahfil-i kazâya terâfu‘ hâze’l-kitâb müsellim Nikola v. Nikite nâm zimmî cevâbında her biri ikrâr ve takrîr-i kelâm edip hâlik-i mezbûrun hîn-i helâkinde üzerinde mevcûd bulunan muhallefâtından merkūm Nikola yetmiş eşyâsını kabz edip meblağ-ı merkūm yetmiş beş bin akçeyi Galata voyvodası Siyavuş Ağa merkūm Nikola yedinden beytülmâle âid olmak zu‘muyla ahz ü kabz edip biz dahi vekâletimiz hasebiyle meblağ-ı merkūmu mezbûr Nikola ve voyvodadan taleb ve da‘vâ eylediğimizde beynimizde münâza‘ât-ı kesîre vâkı‘a olmuşdu el-hâletü hâzihî beynimizde muslihûn tavassut edip meblağ-ı mezbûr yetmiş beş bin akçeden otuz beş bin akçeye bizi sulh eylediklerinde biz dahi sulh-i mezbûru kabûl ve bedeli olan otuz beş bin akçenin otuz bin akçesini voyvoda Siyavuş Ağa yedinden beş bin akçesini merhûm Nikola yedinden ahz ü kabz edip mâ‘adâdan merkūm Nikola’nın ve voyvoda-i müşârün-ileyhin zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Recebi’l-ferd li sene selâse ve seb‘în ve elf Şuhûdü’l-hâl: Mehmed Bey b. Ali el-Cündî, Osman Bey b. Abdullah, Mahmud b. Mehmed, Mustafa b. Osman, Mansur Çelebi b. Mustafa, İbrahim b. Abdülbâkī, İsmail Bey b. Hamza, el-Hâc Mustafa b. Abdullah ve gayruhüm