Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 63 Hüküm no: 23 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sonradan müslüman olan Ramazan b. Abdullah’ın kızı olup Ömer Beşe’nin evinde yetişen Martava’nın müslüman olmadan öldüğü için kilise tarafından defnine karar verildiği Mahmiye-i Galata’da Sultan Bayezid mahallesinde sâkin işbu râfi‘ü’l-kitâb Ömer Beşe b. Abdullah meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip bundan akdem mahalle-i mezbûre ahâlîsinden olup şeref-i İslâm ile müşerref olan gāib ani’l-meclis Ramazan b. Abdullah’ın sulbiye kızı olup hucr ve terbiyemde iken hâlen hâlike olan Martava nâm nasrâniye babası mezbûr Ramazan İslâm ile müşerref olduğu hînde yirmi yaşından mütecâviz olup hâlâ küfrü hâlinde hâlike olmuşdur vâki‘ hâl ahâlî-i mahalleden istihbâr olunup haberleri tahrîr ve hâlike-i mezbûrenin cenâzesini papazları ihrâc ve defne izin verilmesi murâdımdır dedikde mahalle-i mezbûrenin imâmı olan Mustafa Efendi b. Musa ve Mehmed Beşe b. Abdullah nâm kimesneler li ecli’l-istihbâr meclis-i şer‘a hâzırân olup isre’l-istihbâr fi’l-vâki‘ hâlike-i mezbûre Martava babası mezbûr Ramazan İslâm ile müşerref olduğu hînde yirmi yaşından mütecâviz olup hâlâ küfrü hâlinde hâlike olmuşdur deyû her biri alâ tarîki’ş-şehâde haber vermeğin mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehr-i Recebi’l-ferd li sene selâse ve erba‘în ve elf. Şuhûdü’l-hâl: El-Hâc Cafer b. Yakub, es-Seyyid Mustafa Efendi b. el-İmâm, Emrullah b. Mehmed, Hüseyin b. Mirza, Musa b. Receb, Mustafa b. Receb