Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 63 Hüküm no: 24 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haçador v. Gazel’in yeğeni Kirkor’un bazı kişilerce değirmen çarkına atılarak öldürüldüğü iddiasını ispatlayamaması Vilâyet-i Anadolu’da Divriği kazâsına tâbi‘ Zahra nâm karye re‘âyâsından olup mahrûsa-i Galata hısnı ebvâbından Azebkapısı dâhilinde vâki‘ etmekçi dükkânında sâkin iken hâlik olan Kirkor v. Asvader nâm Ermeni’nin ammisi ve usûbet-i nesebiyye cihetinden hasren vârisi olan Haçador v. Gazel nâm Ermeni mahfil-i kazâda zikr olunan dükkânda sâkine tâife-i merkūmeden ashâb-ı hâze’s-sifr Kirkor v. İpek ve Bağdasar v. Ohan ve Vartan v. Aslan ve Ohan v. İpek ve Murat v. Asvader nâm Ermeniler muvâcehelerinde üzerlerine da‘vâ ve takrîr-i kelâm edip merkūm Kirkor mukaddemâ mezbûrun zikr olunan dükkânında değirmen çarkına ilkā etmeleri ile helâk olmağın mezbûrun dem ve diyeti merkūmûndan taleb ederim suâl olunup takrîrleri tahrîr ve mûceb-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip yemîn teklîf olunsun dedikde mezbûrların her birine hâlik-i merkūm Kirkor’u zikr olunan değirmen çarkına ilkā eylemediklerine merkūmûn Kirkor ve Bağdasar ve Vartan ve Ohan ve Murat’a yemîn teklîf olundukda anlar dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhi’s-selâm- etmeleri ile müdde‘î-i merkūm Haçador’u bî-vech ta‘arruzdan men‘ birle mâ vaka‘a bi’t-taleb ketb olundu Fi’l-yevmi’s-sâlis aşer min Recebi’l-ferd li sene selâse ve seb‘în ve elf. Şuhûdü’l-hâl: Mehmed Efendi el-Kadı, Nasuh Efendi el-Kadı, Mehmed Çelebi b. el-Kâtib, Mehmed Beşe b. Mustafa (…), Musa b. Receb, el-Hâc Cafer b. Receb, Âbid b. Mustafa, Muharrem b. Receb