Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 64 Hüküm no: 25 Orijinal metin no: [3b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nuriş v. Asvader’in sol gözünü çıkaran Dolder v. Haçador’la olan davada sulh yapması Medîne-i Galata hısnı ebvâbından Kürkçükapısı kurbunda sâkin hammâl tâifesinden Nuriş v. Asvader nâm Ermeni mahfil-i kazâda yine tâife-i merkūmeden olup zikr olunan Kürkçükapısı’nda sâkin işbu hâmilü’s-sifr Dolder v. Haçador nâm Ermeni tarafından sulh-i âti’l-beyânı tasdîka vekîl olup yine tâife-i merkūmeden el-Hâc Ali b. Abdullah ve Ömer b. Mehmed nâm kimesneler şehâdetleri ile şer‘an vekâleti sâbite olan Kaya v. Diyador nâm Ermeni muvâcehesinde ikrâr ve takrîr-i kelâm edip târih-i kitâbdan üç ay mukaddem müvekkil-i merkūm Dolder bir kemik ile sol gözümü hatâen çıkarmağla mûceb-i şer‘îsi olan nısf diyeti müvekkil-i mezbûrdan da‘vâ ve taleb eylediğimden beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî da‘vâ-yı mezkûrumdan vesâtat-ı muslihîn ile merkūm Dolder beni dört bin akçe üzerine sulh eyledikde ben dahi sulh-i merkūmu kabûl ve bedel-i sulh olan meblağ-ı mezbûru merkūmun yedinden bi’t-tamâm ve’l-kemâl ahz ü kabz edip ba‘de’l-yevm husûs-ı merkūma müte‘allika da‘vâ ve nizâ‘ım yokdur sirâyetinden nâşî fevt olursam dem ve diyetim mezkûrdan taleb olunmaya min ba‘d dem ve diyetime müte‘allik olan cemî‘-i de‘âvî ve mütâlebâtdan zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb ve terkīm olundu. Tahrîren fi’l-yevmi’s-sâlis ve’l-ışrîn min Recebi’l-ferd li sene selâse ve seb‘în ve elf Şuhûdü’l-hâl: Ahmed Efendi b. Ali, Mehmed Beşe b. Mustafa, Mustafa b. Osman, Mustafa b. Receb, Siyavuş b. Abdullah, Hüseyin b. Abdullah, Ahmed Yazıcı b. Mehmed