Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 65 Hüküm no: 27 Orijinal metin no: [4a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üsküdarî Mahmud Efendi vakfı mütevellisi Osman Dede’nin vakfa borçlu ölen Kostantin’e ait rehin evi Fransız tercümanı Batişta v. Tomazo’ya satması Medîne-i Üsküdar’da merhûm eş-Şeyh Mahmud Efendi -kuddise sırruhü’l-azîzin- evkāfına bi’l-fi‘l kāimmakām mütevellî olan el-Hâc Osman Dede b. Davud nâm kimesne meclis-i şer‘-i hatîr-i lâzımü’t-tevkīrde Fransız tercümânlarından işbu râfi‘ü’l-vesîka Batişta v. Tomazo nâm zimmî muvâcehesinde ikrâr-ı tâm ve takrîr-i kelâm edip mahmiye-i Galata hâricinde Kalafatçıbaşı mahallesinde vâki‘ bir tarafdan Gaspar v. Anton nâm zimmî mülkü ve bir tarafdan Kostantin Karaca nâm zimmî mülkü ve iki tarafdan tarîk-i âm ile mahdûd ve dâhiliyye ve hâriciyyede büyût-ı adîdeyi ve bir bi’r-i mâ ve iki kenîfi ve zât-ı eşcâr-ı müsmire ve gayr-ı müsmire bahçeyi müştemil menzil bundan akdem hâlik olan Kostantin nâm zimmînin mülkü olup mâl-ı vakf-ı mezbûrdan zimmetinde deyni olan iki bin dört yüz yetmiş guruş mukābelesinde cânib-i vakf-ı mezbûra rehin vaz‘ ve teslîm eyledikden sonra mezbûr Kostantin hâlik oldukda deyn-i mezkûrunu îfâ edecek menzil-i mezbûrdan gayrı ism-i mâl ıtlâk olunur bir şeyi olmamağın menzil-i mezkûru hâlik-i merkūmun veresesinden meblağ-ı mezbûr mukābelesinde iştirâ ve tesellüm etmişidim, hâlâ ben dahi menzil-i mahdûd-ı mezkûru bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr Batişta’ya iki yüz on bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûrü’n-na‘t iki yüz on bin akçeyi tevliyyetim hasebiyle mezbûr Batişta’nın yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûr merkūm Batişta’nın mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Recebi’l-ferd li sene selâse ve seb‘în ve elf Şuhûdü’l-hâl: Ahmed Efendi b. Ali Efendi, Mehmed Bey b. Ali Haydar, Süheyb Dede b. Abdullah, el-Hâc Mehmed b. Ali, Mehmed Dede b. Osman, Osman Beşe b. Abdullah, Mustafa Çelebi b. Sinan, Mustafa b. Receb, Musa b. Receb, Ömer Beşe b. Mehmed er-Râcil, Âbid b. Mustafa, Emrullah b. Mehmed, el-Hâc Cafer b. Yakub, Muharrem b. Receb ve gayruhüm